Pag-renew sa business permit gilugwayan hangtud Enero 31

GILUGWAYAN sa lokal nga kagamhanan ang iskedyul pagbayad sa business permit nga matapos unta adlaw’ng Martes, Enero 22, apan gi-aprobahan sa konseho ang lugway hangtod Enero 31.

Una na nga nagpadala og sulat ang Oro Chamber ug Misamis Oriental Filipino-Chinese Chamber of Commerce and Industry Inc. naghangyo og lugway gumikan sa kapaspas sa panahon, labi na nga paghuman sa bag-ong tuig ubay-ubay usab ang ilang gi-apas.

Gibutyag ni Kagawad George Goking, tsirman sa komitiba sa Trade and Commerce sa konseho nga wala’y nisupak tungod kaayohan man kini sa katawhan ilabi na sa business sector.

Gidugang pa niini nga aprobado na ang hangyo sa mga negosyante diin karong umaabot nga Enero 31.

“Up to January 31, ilang rason nga wala sila kaandam og maayo kay because of the heavy holidays, gahangyo ang Oro chamber nga himuon nalang nag January 31,” matud ni Goking.

Gitakdang makigtagbo kini sa mga negosyante ug pagahisgutan ang maong iskedyul sa pag-renew sunod tuig ug kung dili makalapas sa bala-od himuon na nga permanente ang Enero 31 diin dakong tabang kini sa mga negosyante. (KCS)