HUMAN sa pipila ka mga adlaw nga nagtago-tago sa kalasangan nitahan ang usa ka lalaki nga suspetado papgpatay sa iyang bayaw sa Lumbia, dakbayan sa Cagayan de Oro, Lunes sa buntag, Enero 21.
Gidala sa Police Station 8 sa Lumbia si Rogin Donggbian, 41, pinaagi sa Barangay Kapitan.
Si Donggbian giingong nakapatay niadtong 2006, dunay kasong frustrated murder sa tuig 2013 ug sexual abuse ug nabilanggo sulod sa kapin tuig.
Gitumbok usab si Donggbian nga ang responsable sa pagpatay sa iyang bayaw nga si Angga, 53, residente sa Barangay Pagalungan sa maong dakbayan.
Gibutyag ni Police Senior Inspector Jerson Estanilla, hepe sa Police Station 8, nga ang igsuon ni Donggbian ang mihangyo niini nga motahan na.
“Giduolan niya iyang igsoon, gi-convince man pud ni siya sa iyang igsoon nga musurrender na lang para e-turn over ka namo sa kapitan, unya gidala dayon ni Kapitan diri sa station,” pahayag ni Estanilla.
Nagtago-tago sulod sa pipila ka mga adlaw si Donggbian sa kalasangan human nisibat.
“Nagtago-tago pa ni siya sa bukid nga portion sa Barangay Pagalungan, pag-follow up namo didto wala na kay nakadagan man sa lasang wala pud mi makuha nga guide didto kay gakahadlok man ang tawo sa iya kay notorious man ni siya,” dugang niini.
GIBADLONG
Nasayran nga tungod lamang sa pagpamadlong giluba ni Donggbian ang iyang bayaw niadtong Enero 17, sa Barangay Pagalungan, dakbayan sa Cagayan de Oro.
"Gibadlong daw sa suspek, ayaw pagsaba-saba kay gabii na giignan man daw siya sa biktima nga nganong magbuot man ka ako man ning kaugalingon. Nahitabo dayon kuno gituok daw ang suspetsado naa man daw kuno plano nga naay kutsilyo kay nagkilaw man sila, iyang gipudyot diretso dayon hansak,” matud ni Estanilla.
Dali pa nga gidala sa kapulisan ang biktima apan gideklara kining dead on arrival sa balay tambalanan human nakaangkon og samad sa wala nga bahin sa dughan.
Samtang giingong kampante na ang katawhan nga mo-apil sa haya sa biktima human nga nitahan ang suspetsado tungod nagbahad man kini nga pamatyon kung kinsa man ang mosumbong sa kapulisan.
Gidugang pa usab nga pursigido ang pamilya nga mopasaka og kaso aron nga dili na kini makabiktima pa.
Ang suspetsado posibleng mag-atubang sa kasong homicide ug kasamtangang anaa sa buhatan sa kapulisan sa Lumbia.