MIHAKOT og upat ka mga medalyang bulawan ang 10-miyembro sa Association for the Advancement of Karatedo (AAK) Davao, usa plata ug 11 ka bronse sa bag-o lang nahuman nga 2nd Manuel Veguillas Memorial Cup didto sa SM Mall of Asia Music Hall sa Pasay City.
Si AAK Davao chief Rommel Tan, nga mao sab ang regional director sa Karate Pilipinas, nagsulti: "We fielded 10 karatekas in the two-day event and all of them won medals."
Sumala niya nga usa kadto ka "high level" sa kompetisyon ug mga kanhi miyembro sa gibungkag nga Philippine Karatedo Federation (PKF) misalmot sab sa torneyo.
"Maganda ang performance this year, nagstep-up lahat," pasigarbo ni Tan sa paghinabi sa teks sa SunStar Davao.
Iyang maguwang nga anak babaye nga si Atsuko Kaiyel Tan sa Davao Christian High School mipupo og duha ka bulawang medalya pinaagi sa pagpatigbabaw sa girls eight to nine years old advance kata ug girls eight to nine advance kumite events.
Si Ian Carlos Pascual sa Asian International School of Aeronautics and Technology (Aisat) ug Aldren Solon sa DCHS miangkon og bulawan sa junior boys -60 kilograms kumite ug intermediate boys 12-13 kata, sa maong han-ay.
Ang nag-inusarang plata nakuha ni Stephen James Cartagena kinsa nahiluna sa ikaduhang puwesto sa cadet boys +63 kgs kumite.
Mga medalista sa bronse mao sila si Ateneo de Davao University's Sofia Agullo (junior girls -48 kgs), junior girls kata team, junior girls kumite doubles, Pascual (junior boys kata), John Paul Ponce sa Precious International School of Davao (cadet boys +63 kgs kumite), Ceth Michael Navarro sa University of the Immaculate Conception (boys 10-11 kumite), Solon (boys 11-12 kumite), Adrian Paul Ilaya (junior boys -55 kgs), Julian Ambrose Ramirez ug Ian Pascual (junior boys doubles kumite) ug Kyzzhia Pauline Navarro sa UIC (girls kumite doubles).
Dugang ni Tan nga ang torneyo mao ang kanhi naila nga Adidas Cup nga giusab ngadto sa Manuel Veguillas Memorial Karate Cup sa milabay nga tuig isip pagyukbo kang AAK founder Manuel Veguillas kinsa namatay niadtong Nobyembre 24, 2017.
Ang AAK Davao kanunay nakigkombati sa tinuig nga karatefest sukad 2013.