WALA pa gani pormal nga magsugod ang kampanya alang sa 2019 midterm elections, nag-iyahay na og pahimutang og mga campaign materials ang mga kandidato. Nag-una-una na og pangampanya.
Ubang mga kandidato iyahay na og papilit sa ilang mga tarpaulin nga dunay dagko nilang mga pangalan, samtang ang uban gisukipan na gyud sa ilang mga dagway.
Wala kaha sila makonsensiya ini nga di pa man intawon karon ang panahon sa kampanya alang sa Mayo 2019 nga eleksiyon?
Wa kaha sila mauwaw ning ilang gibuhat nga kon tan-awon nato, sila man pod intawon ang madaut niini?
Motuo kaha ka kon moingon sila nga wala sila masayud sa nagpakatag sa ilang tarpaulin sa kadalanan?
Gawas niini, duna na gani uban kanila nagpagawas na og mga informercials sa telebisyon ug radyo. Kini bisan tuod kon supak unta sa sumbanan sa Commission on Elections (Comelec).
Apan tungod kay way mahimo ang komisyon sa pagpakgang kanila, misiaw na hinuon og maayo.
Intawon tong kandidato nga way sarang nga salapi ug makinaryas, naghuwat pa gyud intawon sa gitakda nga panahon sa kampanya aron nga di mahutdan og materyales.
Ingon niini ang politika sa nasud, nagkalandrakas, gani misamot pa sa pagligid sa panahon.
Lauman nato nga mas moinit pa gyud ang politika sa mosunod nga mga adlaw.