MAGUINDANAO -- Duol na nga makab-ot sa Moro Islamic Liberation Front (MILF), uban ang katawhang Bangsamoro, ang kadaugan nga mopalig-on sa Bangsamoro Organic Law (BOL) alang sa lima ka probinsiya ug sa Autonomous Region in Muslim Mindanao (Armm).
Kini human sa gipahigayon nga plebisito ug direkta nga pagboto sa mga molupyo sa gitinguha nga mahimong mahisakop sa gisugyot nga Bangsamoro Autonomous Region in Muslim Mindanao (Barmm).
Gibutyag ni MILF peace implementing panel chairman Mohaguer Iqbal nga kung basehan ang ilang nadawat nga dakong pabor sa mga botante og sobra-sobra ang ilang suporta aron mapalig-on ang BOL.
Sa pinakaulahing survey nga gilusad sa Social Weather Station (SWS) niadtong 2018, positibo ang pagsuporta sa katawhan sa Barmm.
Hinuon, dili kampante si Iqbal sa resulta sa survey, hinungdan nga ang MILF naningkamot nga suportahan sa tanan ang BOL pinaagi sa gilusad nila nga kampanya nga gipangunahan sa United Bangsamoro Justice Party (UBJP).
Subay sa SWS survey, 97 porsiyento ang nakuha sa Maguindanao; Lanao del Sur, 94 porsyento; Sulu, 82 porsyento; Basilan, 78 porsyento; Tawi-Tawi, 87 porsyento; Marawi City, 97 porsyento; Cotabato City, 80 porsyento; ug Isabela City, 71 porsyento.
Apan sa pinakaulahing ihap sa mga balota tibuok Armm midaug ang "Yes" alang sa BOL.
Sa Pebrero 6, ipahigayon sab ang plebisito sa unom ka munisipyo sa Lanao del Norte ug 39 barangay sa North Cotabato. (Edgar E. Fuerzas)