MGA duwa karon
4:30 pm- Phoenix batok Columbian Dyip
7:00 pm- NLEX batok KaTropa
Angkunon og suway sa Phoenix Fuel Masters ang solong liderato sa ilang pagpakigbatok sa dili kaluagang Columbian Dyip sa premirong duwa karong hapon sa Philippine Basketball Association (PBA) Philippine Cup sa Araneta Coliseum.
Bitbit ang 2-0 nga rekord, ang Fuel Masters kasamtangang nakigbahin sa NorthPort Batang Pier sa paggunit sa liderato.
Niini pa lang ka sayo, ang Fuel Masters nagpakita na og kalig-on sa ilang dughan pinaagi sa pagdaog sa nag-una nilang duha ka mga duwa nga pulos pinaagi sa overtime diin ilang gibiktima ang Meralco Bolts, 93-92, ug Talk N’ Text Katropa, 93-84.
Sa ilang bahin, impresibo sab nga nakasugod ang Dyip sa komperensya diin ilang gipakuratan ang labing gikahadlukang San Miguel Beermen, 124-118, sa nag-inusara pa lang nilang duwa.
Sayod si Fuel Masters coach Louie Alas niini ug iyang giestudyohan og insakto kon giunsa pagligis sa sa Dyip ang Beermen.
“Main concern ko is their hustle points, points off turnovers, transition points and second chance points. A total of 59 points, almost half of their output,” matod pa ni Alas nga napatik sa PBA.Ph.
“Di kami kailangang ma-outwork ng Dyip.”
Ning sangkaa, ang Dyip mosagubang og kalulian gumikan kay wala ang ilang sinaligang pointguard nga si Jerramy King, kinsa naangol atol sa ilang duwa batok sa Beermen.
Hinuon, malaumon lang gihapon si Dyip coach Johndel Cardel nga makakita ra sila og ikatapak sa haw-ang nga nabiyaan ni King.
Ang Dyip mosalig og insakto sa ilang No.1 overall rookie pick nga si CJ Perez kauban sila si Jackson Corpuz, Reden Celda, JayR Reyes, Russell Escoto ug Eric Camson.
Ang mga nangahisgutan moparang sa mga pambato sa Fuel Masters nga sila si Matthew Wright, Justin Chua, Alex Mallari, Jason Perkins ug Calvin Abueva.
Sa main game, magkombati ang Katropa ug NLEX Road Warriors. (ESL)