ANG Hino Motors Philippines maoy gideklara nga lowest bidder sa P232.5 milyones atol sa bidding proper kagahapon, Enero 22, alang sa pagpalit og garbage compactor truck sa dakbayan sa Sugbo.
Ang laing duha ka bidders, ang Jomara Konstrukt ug RDAK Transport Equipment Inc. pulos na disqualify sanglit adunay kuwang sa ilang bid documents. Hinuon gihatagan kini og tulo ka adlaw sa Bids and Awards Committee (BAC) sanglit nauwahi sila sa pagduso sa ilang motion for reconsideration.
Ang Hyundai wala nipadayon sa pag-apil sa bidding proper samtang ang Jomara nga wala sa pre-bid conference maoy nakatunga.
Si Ronald Malacora, chairman sa BAC, nagkanayon nga niduso og motion for reconsideration ang RDAK diin ila kining gihatagan og tulo ka adlaw makasumiter sa ilang nakuwang nga dokumento.
Ang City Government mopalit og siyam ka six-wheeler 12 cubic meter garbage compactor trucks nga balor og P112.5 milyones. Mokabat ngadto sa kapin o kulang P80 milyones ang bid amount sa Hino Motors.
Ni-bid usab og di mominos P89 milyones ang Hino Motors para sa pagpalit og 12 ka 6-wheeler 8 cubic garbage compactor trucks diin P120 milyones ang approved budget contract ( ABC)nga maoy giilugan sa mga bidder.
“Ang Hino bisan siya maoy gi-declare nga lowest bidder, sa pagsubasta sa mga truck moagi gihapon sila og post qualification. Ang tanan nato gi-require atong i-check kay dili pana siya ma-deklara sa pagkakaron nga maoy mananaog,” ni Malacora pa.
Ang BAC chairman niingon nga karong unang semana sa Pebrero, ang mga sakop sa technical working group moadto sa buhatan sa Hino didto sa Manila para mopahigayon og inspection.
Gipadayag ni Malacora nga kon madeklara nga mananaog ang Hino Motors, makadaginot og kapin o kulang P63.5 milyones gikan sa P232.5 nga approved budget contract.
Ang savings mamahimong ipamalit og laing garbage compactor truck ug ubang proyekto depende sa kagustohan ni Mayor Tomas Osmeña.
Ang winning bidder hatagan unya og 120 ka adlaw aron maka-deliver sa ilang mga unit. Kini aron magamit gilayon sugod sa buwan sa Hulyo ug ning higayona dili na mangabang og garbage compactor ang dakbayan. (PAC)