SRP gilaraw nga butangan og parking area atol sa Sinulog

NAGTINGUHA ang Cebu City Transportation Office (CCTO) nga mogamit og luna sa South Road Properties (SRP) nga maoy himuong parking area panahon sa novena sa kapistahan ni Senyor Sto.Niño ug Sinulog sa matag tuig.

Kini ang nahunahunaan ni Francisco Ouano, operations head sa CCTO, human ilang nasuta nga grabe kadaghan sa mga sakyanan ang midagsa atol sa 10 ka adlaw nga kalihukan.

Si Ouano nipahibawo nga moabot ngadto sa 223 ka mga sakyanan ang na-clamp sa CCTO sanglit gipang-parada kini sa mga no-parking zone palibot sa Basilica del Santo Nino.

Ang mga tag-iya nakabayad og P1,500 matag sakyanan kon P334,500 kapin o kulang ang nakolekta sa City Hall isip penalty.

“Nakita nato nga kining atong parking space dili maka-accomodate og daghang sakyanan because it can only accomodate 100 to 150 vehicles,” pasabot ni Ouano.

Atol sa novena, ang palibot sa Basilica nga kanhi pay parking gihimo nga no-parking zone aron dili mabalda ug dili mahasol ang libuan ka mga tawo nga mosimba matag adlaw hangtod sa gabii.

Si Ouano niingon nga ilang estudyuhan ang pagbutang sa tanang mga sakyanan didto sa bakanteng lote sa SRP diin adunay mga bus nga idestino aron maoy mohakot sa mga driver ug pasahero paingon sa Basilica aron hapsay ang kadalanan.

Gumikan sa kakuwang sa parking, ang ubang mga sakyanan giparada sa mga dili parking area ug ingon man sa mga dapit nga wala gitugot sa CCTO.

Lakip sa mga dapit nga daghang sakyanan ang gipang-clamp mao ang luyo sa Cebu Technical University (CTU) nga dili layo sa ganghaan sa tunnel nga nilagbas sa Plaza Independencia.

Si Ouano nihulagway nga taliwa sa kadaghan sa sakyanan, na-manage gihapon nila ug sila nangayo usab og dispensa ngadto sa mga tawo nga nalangan sa ilang pagbiyahe. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph