HAYAN magminos ang public utility vehicles nga magbahas-bahas sa karsada sa dakbayan sa Lapu-Lapu karong Martes, Enero 29, 2019, di gumikan kay adunay transport strike.
Sa mao nga petsa, gikatakda ang pagpahigayon sa Driver’s Academy Seminar sa Hoops Dome, Barangay Gun-ob, Dakbayan sa Lapu-Lapu.
Ang Driver’s Academy programa nga gipatuman lukop nasud sa Land Transportation Franchising & Regulatory Board (LTFRB).
Giawhag ang tanang driver sa public utility jeepneys, multicabs, v-hire, taxi ug traysikol sa pagtambong sa maong kalihokan nga magsugod sa alas 8:00 sa buntag paingon na sa alas 5:00 sa hapon.
Si Malvin Aries, chairman sa United Drivers Operators Transport Cooperative (UDOTCO), nipahibawo nga way bayranan ang mosalmot sa seminar.
Libre sab ang snacks ug paniudto sa gibana-bana nga 1,000 ngadto na sa 2,000 ka mga partisipante.
Naandan nga ang city government sa Lapu-Lapu mopadagan sa lima ka mga Kaoshiung bus inabagan sa mga barangay nga adunay kaugalingong bus ug Elf trucks nga magamit sa paghakot sa higayon nga adunay matanggong nga mga pasahero.
“Bantayanan ni siyang adlawa kay basin og maghurot ang mga drayber og apil ani (seminar),” matod sa hepe sa City Traffic Management System, Mario Napule.
Sumala pa sa opisyal nga liboan ka mga commuters sa matag economic zones nga naglangkob sa MEPZ 1 ug 2, lakip na ang Cebu Light Industries, wa pay labot sa uban pang regular nga pasahero, ang maapektuhan.
Apan dako og natabang ang ubang alternative transportation sama sa SugboTour bus ug MyBus ingon man ang ferry boats nga alternatibong kasakyan sa mga pasahero.
Ang Driver’s Academy gibase sa memorandum circular no. 2017-013 nga sigun sa pagtuon nga usa sa hinungdan sa aksidente sa kalsada gumikan sa kakuwang sa drayber sa theoritical knowledge ug professional trainings.
Hisgutan sa seminar ang LTFRB policies, road safety, road rage ug anger management, traffic signs ug road pavements lakip na ang good grooming.