MADUGOON ang kaudtuhon sa Barangay Inayawan, Dakbayan sa Sugbo human giingong gitabangan og dunggab ug loglog sa managsuon ang liog sa usa ka delivery boy.
Nahitabo kini sa White Road Inayawan pasado alas 12 sa Martes sa udto, Enero 22.
Namatay si Landrino Mandaya, Sr., 53, minyo, taga White Road, kinsa samdan sa liog, ulo ug ubang bahin sa kalawasan human gipanunggab sa managsuong Arnel, 25 ug Danilo Apostol, 29 , mga molopyo sa nahisgutang dapit.
Sa imbistigasyon ni Eddie Abapo, chief tanod sa Inayawan, gikan nga naghatod sa iyang anak sa eskuylahan si Mandaya ug sa pagpauli niini dunay nakasakay nga amigo.
Dihang nakaagi ang motorsiklo sa tungod sa managsuon, nagkinataw-anay ang biktima ug iyang anglas.
Nagtuo ang managsuon nga sila ang gikataw-an.
Nahitabo ang panaglalis nga niresulta sa sinukmagay.
Nikuha og kusilyo ug icepick sa ilang balay ang usa sa magsuon.
Gidungggab nila si Mandaya, apan nakabawos pa siya kang Danilo, kinsa samdan usab nga gidala sa ospital.
Dugoan nga gihatod sa barangay hall si Mandaya ug gidali pagdala sa tambalanan.
Gisikop sa mga tanod ang managsuon, apan si Arnel pa ang gipriso sa Pardo police station.
Si Danilo toa pa sa Cebu City Medical Center gipatambalan sa iyang samad nga naaangkon. (Vince L. Monterde, Angelo H. Seismundo USJ-R Intern)