Hospital waste nagtipun-og: Garganera

MGA maternity clinics naglisod na karon sa paglabay sa mga inunlan sa mga inahan nga bag-ong nanganak kay kini manimahog maayo human sa pipila ka adlaw nga paghipos.

Mao kini ang pamahayag ni Cebu City Councilor Joel Garganera sa iyang privilege speech atubangan sa Konseho taliwa sa isyu sa mga hospital waste nga gipangdagsa sa kabaybayunan sa Dakbayan sa Lapu-Lapu.

Dugang ni Garganera nga dunay mga ospital nga naghipos sa ilang mga hugaw sud sa mga baril, apan hapit na kini mangapuno.

“Even CCMC (Cebu City Medical Center) is having a difficult time disposing their medical and infectious wastes that seems to have been exponentially increasing by the time,” butyag ni Garganera sa iyang speech.

Si Garganera sa interbyu sa Superbalita Cebu kagabii, nibutyag nga duna nay mga ospital nga nangtipig og binaril nga mga hospital waste nga wa mahakot.

Nabalaka siya nga mahimo kining dako nga krisis.

“That is why we call the attention of the service providers, the City and other agencies to act on this,” matod ni Garganera.

Butyag niya nga mopatawag sila og executive session tali sa mga stakeholders unya sa Enero 30, Miyerkules, aron tukion kining butanga ug mabuhatan og aksyon. (REV)