PALO LEYTE-- Patay ang usa ka big-time drug personality sa Eastern Visayas atol sa drug bust operation sa Butuan City.
Dul-an sa tunga sa milyon nga kantidad sa drugas ang narekober.
Giila ang napatay nga si Jerry Malazarte, taga Barangay Tugas, Bato Leyte.
Matod sa Police Regional Office (PRO)-Eastern Visayas, si Malazarte usa ka level 2 high-value target sa Eastern Visayas.
Daghan ang nagtuo nga nibalhin kini sa Butuan gumikan sa hugot nga kampanya sa PRO- Eastern Visayas batok ilegal nga drugas.
Apan wa nihunong ang kapulisan sa pagmonitor niini sa ilegal nga kalihukan.
Pasado ala 1 Martes sa kadlawon, Enero 22, ang hinusang pwersa sa kapulisan sa PRO- Eastern Visayas Drug Enforcement Group pinangulohan ni Police Superintendent Harry Sucayre uban sa Regional Intelligence Unit ug kapulisan sa Butuan ang nihimo og buy-bust operation sa Barangay Mahay, Butuan City.
Ang suspek napalitan sa poseur buyer og 10 gramos sa gituhoang shabu nga nagkantidad og P118,000.
Nakabantay ang suspek nga pulis ang iyang ka transaksyon busa nibunot kini sa iyang gitakin nga kalibre .38 nga revolver.
Apan naunhan kini sa pulis ug napusilan sa makatulong higayon.
Gidala sa tambalanan ang suspek apan gideklarar kini sa doktor nga dead on arrival.
Dugang narekober sa kapulisan gikan sa lawas ni Malazarte ang laing unom ka dagkong pakete sa gituhoang shabu nga mo timbang og 60 gramos ug may kantidad nga P354,000.
Nakuha usab ang armas nga gigamit niini, mga bala, salapi ug personal nga gamit.
Naa na sa Crime Laboratory sa PRO 13 ang mga ebidensya.