PAGBIYA sa kaipon ug selos ang gituohang hinungdan sa pagpakamatay sa duha ka mga lalaki sa managlahi nga dapit sa dakbayan sa Cagayan de Oro.
Naghikot og pisi sa iyang liog si Samuel Malinao, 29, usa ka construction worker, nga taga Mahogany relocation, Barangay Canitoan, dakbayan sa Cagayan de Oro.
Samtang si Rudy Pagalan, 50, taga Barangay Lumbia sa maong dakbayan, ang napalgan nga nagbitay usab sa punoan sa kahoy ginamit ang pisi nga hikot sa karabao.
Sa nahipos nga impormasiyon, nasayran gikan sa hinigugma ni Malinao nga nagbilin kini og estorya sa ilang pakighinabi sa celfon nga dili pasagdan ang ilang mga anak.
Gibutyag usab sa hinigugma niini nga iya kining gibulagan tungod kini mangulata.
Samtang si Pagalan giingong makadaghan na nga higayon nga misulay og hikog labina kung mahubog.
Kahinumdoman nga laing lalaki ang ni-ambak sa J.R Borja Bridge niadtong nilabay nga gabii tungod gibulagan usab sa hinigugma.
Gikasubo usab kini sa tinugyanan sa City Social Welfare and Development sa dakbayan sa sunod-sunod nga nahitabong mga paghikog ilabi na nga ang dakbayan man lang unta ang nag-inusarang dakbayan sa nasud nga nagtanyag og libreng counselling sa mga nakasinati og mga depresiyon. (KCS)