GIKALIPAY sa kapulisan sa Cagayan de Oro Police Office (Cocpo) ang pag-ubos sa edad sa criminal liability gikan sa 15 anyos ngadto sa 9 anyos.
Gibutyag ni Police Superintendent Mardy Hortillosa, tigpamaba sa Cocpo, nga gikalipay kini sa kapulisan aron na usab nga mahatagan og hustisya ang mga nabiktima sa mga menor de edad.
“Ang amo lang diha nalipay mi nga na-addressan na kana siya kay of course unang-una nitaas atong krimen sa mga bata, daghan na atong mga bata nga 12 years old mopatay na, mangrape na tapos wala’y justice sa pamilya nga nabiktima,” matud ni Hortillosa.
Gidugang pa niini nga angayang nga mamahimong responsable ang mga ginikanan diha sa ilang mga anak aron nga dili kini masalaag sa dili maayong dalan.
“Mao ng kinahanglan nga naa po’y responsibilidad ang ginikanan kung mahimo i-apil ang ginikanan mas maayo para pareho ta tanan nga naa tay responsibilidad, atimanon gyud nato atong anak nga di siya masalaag sa dalan nga di maayo,” dugang niini.
Nagtuo ang kapulisan nga ang nag-edad og 9 anyos dili pa gyud angayang prisohon ug isagol sa mga kriminal.
“Kami pud nagtoo nga dili gyud pud angay prisohon ang bata isagol nimo sa mga hard criminals ang buot nato ipasabot para pud naa’y justice ang mga tawo nga ilang nabiktima kay ang problema man gud ani kung ma makapatay ang bata thank you, how about ang ginikanan? ang pamilya nga nabiktima,” dugang ni Hortillosa.
Giingong nagtoo usab kini nga makatabang kini aron nga mamahimong responsable ang mga ginikanan ug gisalig na lamang sa Kongreso gumikan na usab kay dili man basta-basta ang mga Kongreso nga magbuhat og bala-od nga ikadaot sa mga bata ilabi na nga mga pamilyado man usab kini.
Pipila usab sa mga ang kadaiyang sektor ang nagpahigayon og panagtigom niadtong Martes, Enero 22, sa Kiosko kagawasan, Divisoria ug nagpadayag sa ilang pagsupak sa pag-ubos sa edad nga pwedi na mapahamtangan og silot nga makasupak sa bala-od.