NANGHIMULSO ang SunStar Superbalita sa pipila ka mga ginikanan nga adunay mga anak nga nagpangidaron og 9 anyos pataas kon uyon ba sila sa giaprobahan nga balaodnon nga pagpaubos sa minimum age sa criminal responsibility nga gikan sa 15 anyos giubos sa 9 anyos.
Si Darwin Oca niingon nga iyang anak karon 9 anyos pa apan dili niya malantaw nga responsable na kini sa mga kriminalidad.
“Dili nako malantaw kung nganong ingon ana ka ubos ang pangidaron okay ra unta to bisan 12 years old lang,” matud niini.
“Naunsa naman hinuon ni atong nasod karon apil-apilon naman ang mga bata,” sulti sab ni Abeth Humawan.
“Para sa ako dili angay nga i-ubos ang criminalidad sa 9 anyos tungod bisan unsaon nato og tan-aw ang 9-anyo bata pa sila. Ang ilang ilang pangisip dili pa saktong hingkud para lohika, moralidad, ug hingkud nga pamatasan. We teach a child and not persecute them,” reaksyon sab kini ni Roentgen Buray.
Apan aduna sab usa ka ginikanan nga naglantaw sa positibo niini.
“Ang maayo ug boutan nga bata magikan gyod na sa mga ginikanan kon giunsa nila pagpadako nga dili maghimo og krimen. Daghan man gud mga bata karon nga kahibalo na mangawat, kahibalo na mang-rape, gagamiton sa mga dagkong personalidad aron mahimo sa illegal nga kalihokan. Daghan sab karon naimpluwensyahan na og maayo sa social media ug dili na makontrolar ang unsay ilang matun-an diha,” kini ang taas sab nga reaksyon ni Cherry Legaspi.
Dugang niini nga dili maghimo og balaodnon ang nasod kon walay gibasihan niini.
“Tan-aw nako ilang gusto proteksyonan atong mga kabataan,” pasabot niini.
Kahinumduman nga niadtong Lunes ang justice panel niaprobar sa substitute bill nga moamendar sa Republic Act (RA) 10630, ang balaodnon nga nag-retain sa minimum age of criminal liability sa edad nga 15, apan nagtugot sa 12 anyos nga idetained sa youth care facilities o Bahay Pag-asa alang niadtong seryoso nga nahimo nga krimen sama sa rape, murder, ug homicide.
Ang RA 10630 kanhi miamendar sa RA 9344 o mao ang Juvenile Justice and Welfare Act of 2006 nga nagset sa edad sa criminal responsibility sa edad nga 15 anyos.
Gimando sa House Bill nga ang kabataan nga nag-edad sa 9 ngadto 14 anyos nga makahimo og krimen sama sa murder, parricide, infanticide, serious illegal detention, carnapping, ug kasupakan sa ginadili nga druga ang gimandato nga ibutang sa rehabilitasyon ug Bahay Pag-asa.
Si House justice panel chairperson ug Oriental Mindoro 1st District Representative Salvador Leachon niingon nga ang maong balaodnon naglantaw lamang aron protektahan ang kabataan nga gamiton sa mga sindikato aron mohimo sa krimen. (SVB)