NAHIMONG isyu karon ang pagpasar sa balaodnon diin giubsan sa 9 anyos ang criminal liablity sa mga batan-on gikan sa 15 anyos.
Daghan ang wala nahimuot niini nga mga ginikanan apan duna sab miingon nga wala kini problema kon ang usa ka bata gipadako nga maayo.
Si Monsignor Perseus Cabunoc, kura paruko sa St. Augustine Church, niingon nga ang ginikanan maoy adunay dakong responsibilidad sa ilang mga anak nga nag edad og susama niini.
Kini tungod sila maoy adunay tulubagon labina nga mga edad naa pa ubos sa poder sa ginikanan ug sila maoy angayan mohatag og maayong pagtulun-an aron dili masugamak sa unsa man nga krimen.
“Ang ginikanan maoy dakog responsibilidad ug tulubagon ning edara ug ubos pa sa ilang poder under pa nila ang paghatag og leskyon nga dili masugamak sa ingon ani kung responsable lang kaayo,” matud ni Cabunoc.
“Dili malikayan nga naay mga iresponsable pasagdan ilang mga anak,” dugang pasabot niini ug miingon nga molampos kini kung disiplinahon ang mga anak sa maayo nga paagi.
“Wala gihapon kapaingnan kon sama sa kahoy ang sanga lang ang giputol apan daot na ang gamot dili gihapon magsilbi kay ang gamot maoy problema,” matud ni Cabunoc.
Dugang niini nga ang simbahan karon adunay mga gitanyag nga mga programa alang sa mga kabatan-onan nga dili sila masugamak sa dautan. (SVB)