Nagmaneho'g motorsiklo patay sa bangga

NAKABSAN sa kinabuhi ang usa ka driver human nabangga ang gimanehong motorsiklo sa dakbayan sa Gingoog, Misamis Oriental.

Giila ang biktima nga mao si Arnold Cinco, 54, residente sa susamang dakbayan.

Samaran sab ang angkas niini nga giilang si Danilo.

Sa inisyal nga report, nasuta nga ang mga biktima pauli sa ilang puloy-anan gikan sa trabaho sa lungsod sa Medina dihang mi-overtake kini sa laing motorsiklo.

Adunay pribadong sakyanan nga nakatabo niini maoy hinungdan head on ang pagkabangga.

Sa kusog sa dagan ug impak hinungdan nga grabeng kadaot sa ulo nga naangkon sa biktima.

Gidala pa sa balay tambalanan sa dakbayan sa Gingoog unya giduso ang biktima sa ospital sa dakbayan sa Cagayan de Oro.

Apan nakabsan kini sa iyang kinabuhi human wala maagwanta ang grabeng bun-og sa lawas nga naangkon.

Ang iyang kauban naa na sa luwas nga kahimtang karon panahona.