PIPILA ka dapit na lang sa Mindanao nga buot ipailalom sa Bangsamoro ang wa pa makapahigayon sa ilang plebisito kay gikatakda pa sa unang semana sa Pebrero aron ipagawas ang ilang sentimento kon uyon ba o supak nga iapil ang ilang dapit sa pagdumala sa Bangsamoro.
Mismo si Presidente Rodrigo Duterte mikampanya nga dawaton sa katawhan ug moboto og “Yes” panahon sa plebisito niadtong Lunes, uban ang pagtoo nga mao kini ang mahimong susi aron pagkab-ot sa kalinaw sa isla sa Mindanao apan ubay-ubay sab sa taga Cotabato City ang miboto og “No” tungod kay piliay man aron mapagawas ang ilang sentimento.
Sa kinatibuk-an milabaw ang boto nga “Yes” apan andam na ba ang mga misupak nga mosunod sa sistema sa pagdumala sa Bangsamoro ugaling pabor ang mayoriya.
Atong nakita nga sagad sa mga dapit diin mga Moro ang nagpuyo pabor sa BOL ug duna pay mga dapit diin zero ang “No”, samtang sa mga dapit diin dunay mga Kristiyano sama sa dakbayan sa Cotabato gamay lang ang lamang sa “Yes” votes.
Pagsinabtanay ug pagrespetuhay lang unta ang gikinahanglan aron mabatnan ang kalinaw apan daw tubig ug lana ang kahimtang kay managlahi ang kultura ug tinuohan sa mga Moro ug Kristiyano nga gikan sa kaliwat ni Abraham kang Isaac ug Ismael.
Bisan mismo sa dakbayan sa Davao daghang mga Moro ang mohawa sa ilang dapit ug mangita'g kabalhinan kay ilang silingan maglitson og baboy sa ilang tugkaran ang aso manumbalay sa Moro nga silingan.
Duna sab mga Kristiyano kuno ang magsige'g yawyaw kay alingugngog ang iyang silingan kay sayo sa buntag mag-ampo sa ilang mosque apan mogamit sab og trumpa panahon sa ilang pag-sambayang.
Nakadayeg ko sa paningkamot ni Presidente Duterte nga makab- ot ang tinud-anay nga kalinaw apan sa personal nakong pagtoo ug pagsabot kon duna may makab-ot nga pagsinabtanay duna kini kinutoban.
Ang Diyos nagpahibalo nang daan pinaagi sa iyang mga manalagna unsa ang mamahimong kahimtang sa kalibutan sa ulahing mga adlaw tungod dili siya gusto nga ang katawhan mahimong walay hanaw.
Kon ugaling magmalampuson si Presidente Duterte nga magkahiusa ang mga Moro ug Kristiyano, ato kining pasalamatan apan mamahimo kini nga pipila lang ka higayon dili hangtud sa kahangturan.
Wala pay nasipyat sa mga gikatagna sa Bibliya ug buot nako kining ipaambit sunod higayon aron atong masabtan asang bahina na ta sa kalibutan, dili aron danihon mo nako sa akong tinuohan.