COTABATO CITY -- Mahisakop na sa Bangsamoro Autonomous Region in Muslim Mindanao ang Cotabato City.
Sa final and official results gikan sa Cotabato City Plebiscite Board of Canvassers sa Commission on Elections (Comelec), nakakuha og 36,682 ang “Yes to Bangsamoro Organic Law” (BOL) samtang ang “No to BOL” dunay boto nga 24,994.
Sa Maguindanao Province, midaug ang “Yes” samtang gamay lang nga boto ang nakuha sa “No.”
Nagpasalamat si Moro Islamic Liberation Front (MILF) chairman Aljads Murad Ibrahim sa suporta sa katawhan nga miboto pabor sa BOL alang sa dugay na kaayo nga gipangandoy nga kalinaw ug kalamboan sa mga dapit nga mahisakop sa Barmm.
Girespeto ni Murad ang katawhan sa Cotabato City nga miboto og “No” kay ila kining katungod ilawom sa demokrasya nga nasud.
Matud niya nga panahon na sa panaghiusa, kalimtan ang kaligutgot sa matag usa ug ipakita pagminahalay kristiyano man, muslim ug lumad.
Gidasig sab ni Murad ang mga dapit sa Maguindanao nga zero ang nakuha sa “No” susama sa Datu Montawal kon diin ang boto sa “Yes” niabot og 16,678.
Gihulat na lamang sa liderato sa MILF ang go signal sa gobyerno kung kinsa ang molingkod nga transition government sa Barmm. (Edgar E. Fuerzas)