LAING world-class nga barko sa Cokaliong Shipping Lines Inc., ang M/V Filipinas Cagayan de Oro, ang ilusad karong Sabado, Enero 26, nga mobiyahe sa siyudad sa Cagayan de Oro.
Kini ang ika-13 nga roro-passenger vessel sa Cokaliong fleet nga narehistro sa International Association of Classification Societies (IACS) ubos sa Registro Italiano Navale (RINA) nga nagbase sa Italy.
Si Chester Cokaliong, founder, chief executive officer ug chief operating officer sa CSLI, nipahibawo ang maong barko napalit nila sa kantidad nga 285 milyones yen nga gikan sa Kobe City sa Hyogo Prefecture sa Japan.
Apan moabot sa P260 milyones ang kinatibuk-ang balor niini, apil na ang nagasto alang sa renovation ug P18,839,326 nga duties, taxes ug value-added tax nga nabayran sa CSLI.
Kini ang mopuli sa rota sa M/V Filipinas Jagna nga mopaubos sa mandatory dry docking.
Si Cokaliong nagkanayon nga bisan og ningmahal na ug mas dako ang konsumo sa lana sa maong barko, ipabilin nila ang pletihan sama sa ilang gikolekta sa mv Filipinas Jagna.
Sigon niini hayan sa Pebrero 2 o Pebrero 5 magsugod og biyahe ang ika-13 nga barko sa pantalan sa Cagayan de Oro.
Matod ni Cokaliong, human sa mandatory dry docking, mosud ang M/V Filipinas Jagna sa Galas Feeder Port sa siyudad sa Dipolog nga mobiyahe katulo sa usa ka semana sugod sa Marso.
Mas dako og cargo space ang M/V Filipinas Cagayan de Oro ug mas daghan usab ang masakay niini nga pasahero nga moabot og 631, kon itandi sa 625 sa M/V Filipinas Jagna.
Ang bag-ong barko adunay cabin, economy, tourist ug business class accommodations nga kapilian sa mga pasahero.
Paspas usab ang dagan sa M/V Filipinas Cagayan de Oro sa gikusgon nga 16 knots.
Moabot sa 3,122 gross tonnage ang gibug-aton niini samtang 85.76 metros ang gitas-on ug 14.60 metros ang gilapdon sa maong 18 ka tuig nga barko.
Niadtong Hunyo 24, 2018, dihang naabot sa Pilipinas ang maong roro-passenger vessel ug sud sa pito ka mga buwan gipanindot kini sa CSLI sa dili pa sugdan ang pagpalawig niini.
Ang barko nga nahimo niadtong Pebrero 2000, maggamit og duha ka units sa Daihatsu 4,000 PS alang sa main engines ug duha ka units sa Daihatsu 750 PS alang sa auxiliary engines.
Kini ang ikaduhang barko sa CSLI nga dunay Controllable Pitch Propeller (CPP) gawas sa mv Filipinas Nasipit ug gitauran og bag-ong Terasaki Watch-Free System WE500 Engine Monitoring System nga maoy ikaupat nga barko nga naa niini.
Kini nga barko naggamit usab og navigational equipment sama sa single-sideband (SSB) radiotelephone, very high frequency radiotelephone nga dunay digital selective calling (DSC), automatic identification system (AIS), global positioning system (GPS), doppler log, echo sounder, gyro compass and magnetic compass, navigational telex (Navtex), search and rescue transponder (SART), bridge navigational watch alarm system (BNWAS) ug duha ka radars nga dunay automatic radar plotting aid (ARPA).
Si Cokaliong namahayag nga wa silay hunong sa pagpalit og mga barko aron maserbisyohan ang mga sumasakay gawas sa Sugbo ug maghatod og dugang kauswagan sa mga dapit nga giserbisyohan niini.
“Shipping is still the cheapest mode of transportation compared to airlines,” matod niya.
Gani, karong Nobiyembre, laing roro-passenger vessel na usab sa CSLI ang moabot, ang M/V Feelease Soya nga nahimo niadtong Abril 2001 gikan sa Wakkanai City sa Hokkaido Prefecture sa Japan, nga maoy kinamahalan sa tanang mga barko nga ilang napalit.
Siya nibutyag nga mokabat sa 700 milyones yen o P336 milyones ang pagpalit nila sa M/V Feelease Soya, wala pay labot niini ang bayranan sa buhis sa gobiyerno ug pagpanindot usab niini.
Ang ika-14 nga barko sa CSLI maoy kinadak-an nga moabot ngadto sa 95.70 metros, may gibug-aton kini nga 3,551 gross tonnage ug 15 metros ang gilapdon.
Posibleng sa siyudad sa Ozamis ug Surigao kini mobiyahe sa unang quarter sa 2020.
Ang M/V Feelease Soya maggamit og duha ka units sa Daihatsu 3,200 PS alang sa main engines ug duha ka units sa Daihatsu 600 PS sa auxiliary engines.
Gumikan sa duha ka bag-ong mga barko, dugang 100 ka mga officer ug mga tripolante ang makatrabaho sa CSLI.
Ang M/V Feelease Soya rehistrado usab sa IACS ubos sa RINA.
Karong Disyembre 8, saulogon sa CSLI ang ika-30 nga anibersaryo niini.
Sigon ni Cokaliong 10 sa ilang mga barko ang narehistro sa IACS, upat sa Bureau Veritas sa France ug unom sa RINA.
Si Cokaliong, kanhi presidente sa Visayan Association of Ferryboat and Coastwise Service Operators (VAFCSO), namulong nga kasagaran sa mga shipping lines sa Pilipinas o gibanabanang 90 porsyento kay local class lang o wala maila sa tibuok kalibotan.
“We are registered worldwide. Nakarehistro atong mga barko. Recognized ta ba. Ang local class di man mo-appear ang imong ngan didto,” paambit niini kinsa nidugang nga giila usab sila sa International Maritime Organization (IMO).