SECTIONS
Thursday, February 21, 2019
SUPERBALITA CEBU

San Fernando ‘nagping-it sa kasakit’

TUNGOD SA KALAPAD: Mokabat sa 73 ka mga kabhang ug bala sa M16 Armalite rifle ang nakuha sa Scene of the Crime Operation (Soco) sa dapit diin gi-ambush sila si San Fernando Mayor Lakambini Reluya sa may Linao, Dakbayan sa Talisay. Tungod sa nagkatag nga mga bala, gipalapdan sa kapulisan ang ilang cordone. Ang resulta? Grabe ang paghuot sa traffic niadtong Martes sa gabii, niadtong padung sa south ug norte. Dunay mga biyahidor nga nauli human sa walo ka oras nga biyahe. (Alan Tangcawan)

TULO na ka semana nga naka half-mast ang bandila sa lungsod sa San Fernando human sa sunod-sunod nga mga pagpusil patay sa ilang mga opisyales.

Una nga gipusil patay sa wa pa nailhing riding-in-tandem niadtong Enero 10 si Konsehal Rene Boy Dacalos.

Sunod nga gipusil patay niadtong Enero 18 si Magsico Barangay Kapitan Johnny Arriesgado, kinsa kanhi konsehal usab sa lungsod.

Ang labing uwahi mao si Association of Barangay Councils (ABC) president Ricardo “Nonoy” Reluya, Jr., kinsa kapitan sa Barangay Panadtaran.

Sa pagduaw sa Superbalita Cebu sa municipal hall way elected officials nga ning-atubang.

NABAKANTE

Ubay-ubay ang nabakante nga mga lingkuranan sa konseho sa lungsod tungod sa kamatayon sa mga konsehal samtang duna say naka on-leave.

Si Edcel Laguda, acting municipal treasurer, niingon nga si San Fernando Vice Mayor Fralz Sabalones wa na usab nitambong sa iyang mga session.

Matod ni Teodisia Tapere, secretary sa Sanggunian, nga si VM Sabalones dugay ra nga ga on-leave ug wa na nagpakita sukad niadtong Hulyo 2018.

Ang bise mayor maoy igsuon ni self-confessed drug lord Franz Sabalones.

Si Franz wa na usab igkita sa kapulisan.

Nag-leave na sud usab sa tulo ka mga semana sila si Councilors Alfonso Donaire IV ug Edwin Villaver.

Aduna pay lima ka mga konsehal nga nahibilin sa konseho sa San Fernando.

Mao kini sila si Konsehal Gema Bacala, nga mao say acting vice mayor, Philip Medalla, Eutiquio Baricuatro, Erico Enad, ug Teodomiro Luzano.

Wala usab sila nagpahigayon og emergency session mahitungod sa mga nahitabo.

Di lang kini ang unang panghitabo nga dunay local government unit nga nabakante ang pwesto sa mayor ug vice mayor.

Sa miaging tuig, ingon ani usab ang sitwasyon sa lungsod sa Ronda kinsa unang gi ambush ug gipusil patay si Vice Mayor Jonah John Ungab sa usa ka wa mailhing mamumuno.

Paglabay sa pipila ka buwan, gipusil patay usab sulod sa iyang opisina si Mayor Mariano Blanco III.

WA MAHIBAWO

Si Lagduda niingon nga wa sila masayod hain nga ospital si Mayor Reluya, apan anaa na kini sa maayo nga kahimtang karon.

“Si Mayor, wa gihapon mi kontak sa iyaha pero sa kuyog niya, nag communicate na mi unsay kinahanglanon. Pero as to the location, and other matters, wa pa mi kahibalo for security. Basta sa karon, ang assure lang gyud is Mayor is stable na. She’s safe,” sigon niya.

Ang mga empleyado sa munisipyo nakurat ug naguol sa mga nahitabo sa ilang lugar.

Matod ni Laguda nga ang tanan mga empleyado sa munisipyo wa na kahibalo unsay ilang buhaton sa sunod-sunod nga pagpatay sa ilang mga opisyales.

Silang tanan hilabihan nga nasagmuyo ug nasubo.

Sigon niya nga bisan sa nahitabo, padayon gihapon ang ilang mga serbisyo sama sa naandan.

Anaa silay mga one stop shop sa pag renew sa mga business permit ug ang tanan mga empleyado padayon gihapon sa panarbaho.

Ang mga lumulupyo ug empleyado ni Kapitan Reluya sa Panadtaran naghilak nga nakighinabi sa Superbalita Cebu sa nadangatan sa ilang lider.

Matod nila nga maayo nga tawo si Kapitan Reluya.

Masinabtanon kini, buotan, mangiluy-on sa iyang mga sakop ug motabang kanila bisan di niya tawo.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!