Pulis: Drug overdose ang namatyan sa dalaga

CEBU. Police Regional Office-Central Visaya Director Debold Sinas. (SunStar)
CEBU. Police Regional Office-Central Visaya Director Debold Sinas. (SunStar)

AMAHAN sa 19 anyos nga dalaga nga si Ashley Abad nga namatay human, matod pa ma-overdose sa usa ka druga atol sa concert party niadtong Sabado sa gabii, Enero 19, nagpa-blotter na sa Mabolo police station, dakbayan sa Sugbo.

Kapulisan mopatawag sa mga kauban ni Ashley lakip na sa uyab niini nga giila na nga person of interest.

Mihatag usab sa death certificate ang amahan ngadto sa PNP Crime laboratory sa hinungdan sa kamatayon ni Ashley nga matod pa na overdose lang sa gitumar niini nga dangerous drug.

Wala mabutang kung unsa nga klase sa druga ang nakaingon sa iyang kamatayon.

Matod ni Chief Supt. Debold Sinas Director sa Police Regional Office (PRO) 7, usa ka medical doctor ang nihiling kang Ashley nga wala matod pay kapasidad nga makatumbok kung unsa nga klase sa druga ang nainom sa batan-on.

Nagkinahanglan og forensic doctor nga adunay kahimanan pag-ila sa druga nga natulon sa usa ka biktima kini pinaagi sa pag-autopsy sa lawas.

Ang rason sa autopsy mao ang pagkuha sa fluid sample sa ginhawaan kung unsa nga matang sa druga ang nakaon sa biktima.

Tungod niini, nagtambayayong na karon ang PRO-7 ug ang Philippine Drug Enforcement Agency 7 alang sa himuon nga imbestigasyon.

Gipasabot ni Sinas nga gikinahanglang sa imbestigasyon ang hinungdan sa kamatayon pinaagi sa pagsusi sa expert sa PDEA ug sa PNP Crime laboratory.

“In case we will push through the investigation syempre kinahanglan ang cause of death eh, we have already tap the expertise of PDEA because PDEA has the expertise to test,” matod ni Sinas.

Kung makasugod na sila sa ilang imbestigasyon, matod ni Sinas, ilang ipatawag ang tanang kauban ni Ashley sa concert lakip na ang organizers niini.

Usa sa hangyo sa ginikanan ngadto sa kapulisan nga masayran kinsa ang naghatag sa druga ngadto sa ilang anak lakip na ang supplier.

Kung makuhaan na og pamahayag ang uyab ni Ashley ug mga higala niini masayran dinhi kung asa gikan ang drugas.

Giangkon sa PRO-7 Director nga aduna gyuy pagkuyanap sa Ecstasy o party drugs sa syudad sa Sugbo sukad siya naabot dinhi.

Aduna silay listahan sa mga namaligya niini nga ila nang giduso usab sa PDEA-7 alang sa monitoring ug sa umaabot nga anti drug operation.

Matod ni Sinas nga lisud panakpon ang mga supplier sa Ecstasy itandi sa shabu tungod kay ang mga kaila ra usab nga adunay kaya sa kwarta ang makapalit sa maong matang sa illegal nga drugas.

Kasagaran ang pinalitay sa Ecstasy diha sa mga bar diin mga arangan sa kinabuhi lang ang maka-afford sa pagpalit niini nga druga. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph