SECTIONS
Tuesday, February 19, 2019
SUPERBALITA CEBU

'Pusher' sa Leyte napatay sa pulis didto na sa Butuan

PALO, Leyte- Patay ang usa ka bigtime drug personality sa Eastern Visayas atol sa drug bust operation sa Butuan City niadtong Miyerkules, Enero 22.

Samtang dul-an sa P500,000 nga kantidad sa drugas ang nasakmit.

Giila ang napatay nga si Jerry Malazarte, taga Barangay Tugas, Bato, Leyte.

Matod sa Police Regional Office (PRO) 8, si Malazarte usa ka level 2 high value target (HVT) sa Eastern Visayas.

Daghan ang nagtuo nga nibalhin siya sa Butuan gikan sa Leyte gumikan sa hugot nga kampanya sa PRO 8 batok ilegal nga drugas.

Apan wa nihunong ang kapulisan sa pagmonitor kaniya.

Human sila makadawat og taho nga niadto kini sa Butuan, girumbo gilayon sa team sa PRO 8 ang siyudad.

Sa wa pa ang operasyon, nakig-alayon sila sa Butuan police.

Pasado ala 1 sa kaadlawon kagahapon, hinusang pwersa sa kapulisan sa PRO 8 Drug Enforcement Group, pinangulohan ni P/Supt. Harry Sucayre, uban sa Regional Intelligence Unit (RIU) 8 ug kapulisan sa Butuan nihimo og buy bust operation sa Barangay Mahay, Butuan City.

Ang suspek napalitan sa poseur buyer og 10 gramos sa gituhoang shabu nga nagkantidad og P118,000.

Nakabantay si Malazarte nga pulis ang iyang katransaksyon, giingong nibunot kini sa iyang gitakin nga kalibre .38 nga revolver.

Apan naunhan siya sa pulis ug napusilan sa makatulong higayon.

Gidala sa tambalanan si Malazarte, apan gideklarar sa doktor nga dead on arrival.

Dugang nakuha sa kapulisan gikan sa lawas ni Malazarte ang laing unom ka dagkong pakete sa gituhoang shabu nga motimbang og 60 gramos ug may kantidad nga P354,000.

Nakuha usab ang armas nga gigamit niini, mga bala, salapi ug personal nga gamit.

Naa na sa Crime Laboratory sa Police Regional Office (PRO) 13 ang mga ebidensya. (JKDP)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!