SUPERBALITA CEBU

Feliciano andam magpaimbestigar sa pulis

CEBU. Ang mga empleyado sa San Fernando Municipal Hall nagbitay og itom nga panapton isip simbolo sa pahasubo sa kamatayon sa ilang kauban. (Alex Badayos)

MASALIGON ang magpapatigayon nga si Ruben Feliciano nga dili lamolamu-on sa kapulisan ang imbestigasyon sa pagbanhig sa grupo nilang San Fernando Mayor Lakambini “Neneth” Reluya nga gikamatay sa iyang bana ug laing duha ka mga tawo.

Kini bisan paman ug gitagalan lang ang lokal nga mga pulis ug duha ka semana pagsulbad sa krimen.

Mipadayag sab ug kaandam si Feliciano pagsumitir sa iyang kaugalingon sa imbestigasyon, ilabi na kay gidudahan ni Mayor Reluya nga politically-motivated ang insidente.

Si Feliciano mo-atbang ni Reluya pagka-mayor sa San Fernando karong May 2019 elections ug giingong may mga post siya sa social media labot sa pagpa-patay sa mga Reluya ug uban pang personalidad sa lungsod nga giingong nalambigit sa ilegal nga drugas.

“Yes (I’m willing to undergo investigation). Mao ni problema pag-ingon ani (krimen), always politically motivated,” niingon si Feliciano sa interview sa dyHP.

Ang Cebu Provincial Police Office ug ang Talisay City Police Station gitagalan ni PNP chief, Director General Oscar Albayalde ug duha ka semana pagsulbad sa krimen.

Taliwala niini, masaligon si Feliciano nga dili luto-on o bino-angan sa kapulisan ang imbestigasyon sa insidente. Kompiyansa sab siya nga mogawas ang kamatuoran diha sa pakisusi, lakip na ang iyang gitumbok nga kalambigitan sa mga Reluya sa mga iregularidad ug ubang ilegal nga kalihukan.

“At the end of the day, the truth will surface ug unsa sila, asa sila engaged, ang ilang illegal activity. Mahibalo man gihapon na. SOP (standard operating procedure) man na mag-conduct investigation basta ana,” padayag ni Feliciano.

Nagduda si Feliciano nga may ni-hack sa iyang Facebook account o kaha may naghimo ug mga dili tinuod nga mga account nga nagdala sa iyang pangalan ug maoy naghimo sa mga pamahayag, nga daw naghulga sa mga Reluya ug ubang personalidad nga pamatyon.

Subay niini, andam gihapon siya nga mo-atubang sa posibleng imbestigasyon kay matod pa limpyo ang iyang konsensiya.

Giangkon hinuon niya nga sa iyang mga pulong-pulong sa nagkadaiyang dapit sa San Fernando, nakapamahayag siya nga mopapatay sa mga tawo sa ilang dapit nga nalambigit sa ilegal nga drugas.

Matod niya, mao kini iyang paagi pagsuporta sa kampaniya kontra droga sa kagamhanan.

“During my speeches in San Fernando, kahibalo nila na, I presented my platform of government. Number one, illegal drugs. I even cautioned them, I warned all involved in illegal drugs kay dugay na nang problema sa San Fernando, illegal drugs. I told them, ‘better evaporate’. If I’m destined to be there, kung ako na ang mayor, better evaporate San Fernando or else I will kill you. Very clear because I’m supporting the progam of the gvoernment against illegal drugs,” pasabot sa magpapatigayon.

Si Feliciano maoy pangulo sa First Sangat International Port, Incorporated, nga nagplano pagtukod ug multi-million nga international port project sa lungsod sa San Fernando. Gipahunong sa LGU ang proyekto tungod sa giingong kuwang nga mga dokumento niini.

Ang maong proyekto maoy hinungdan nganong sa San Fernando na nanimuyo si Feliciano sa nilabay nga 4 ka tuig. Usa siya ka Chavakano ug lumad nga taga-Zamboanga City.

Sa wala pa ni-anhi sa Sugbo, konektado siya sa timber ug mining industry sa Davao.

“I’m here in San Fernando not to create trouble, not to create problem. I’m here to help improve the community,” sigun ni Feliciano.

Niadtong Oktobre sa miaging tuig, niduso siya sa iyang certificate of candidacy (COC) alang sa pagpapili pagka-mayor sa San Fernando ug atbangan si Mayor Reluya.

Taliwala sa alegasyon nga may kalabutan siya sa pagbanhig sa sakyanan sa mayor ug bisan sa pagpahunong sa iyang proyekto sa San Fernando, wala’y plano si Feliciano nga mo-atras sa pinili-ay.

“I will continue, never turning back. I will continue my platform of government to help the people of San Fernando,” niingon siya.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph