GIKUMPIRMAR sa Misamis Oriental Provincial Police Office (Moppo) nga duha na ka masinupakon sa election gun ban ang nadakpan sa kapulisan.
Gibutyag ni Moppo Spokesperson Police Inspector Princess Joy Enriquez nga ang unang nadakpan sa gikan sa lungsod sa Claveria ug sunod sa lungsod sa Balingoan Misamis Oriental.
Nadakpan sa Claveria mao si Eric Lintao, 30, minyo, kinsa iyang gihadlok ngadto sa magsuon nga mao sila si Wowie ug Mark Anthony Abregana.
Nakuhaan kini og armas nga walay mga insaktong dokumento.
Samtang sa lungsod Balingoan nasikop mao kini si Ronald Verador, kinsa usa ka backhoe operator.
Matud ni Enriquez nga sakay kini sa iyang motorsiklo ug gipara apan wala kini mihunong.
Aduna pay gukdanay nahitabo ug dihang nasapon kini, nasuta nga walay dokumento ang motorsiklo niini nga gibyahe, ug didto sa u-box niini nadiskubre nga adunay pistol nga wala sab gihapon dokumento.
Balhog sa prisuhan ang suspek karong panahona kinsa gawas nga nakasupak sa Commission on Elections gun ban nagmaneho pa sa motorsiklo nga walay gipakitang lisensya. (SVB)