ONSE ka mga public school teacher ug tulo ka mga negosyante ang nidangop sa National Bureau of Investigation (NBI) niadtong Miyerkules, Enero 23, human giingong na-scam.
Gireklamo sa mga magtutudlo ug mga negosyante si Fredireck Valdez, 30, lumad nga taga Iligan City; ug Fredrich Manguiran, lumad nga taga Malaybalay City.
Kini human ilang nadiskubre nga scam ang nahitabo sa ilang gipang-invest nga dagkong kantidad nga gipaagi sa booking ug insurance investment.
Si Jey, (nihangyo pagtago sa iyang identipikasyon) nibutyag nga tuig 2016 siya nagsugod sa pag-invest sa FnF Travel and tours ni Valdez ug aron makasugod niini kinahanglan mobayad og P99,000 isip franchising fee.
Human niini gitanyagan dayon siya nga maoy mo-finance sa mga dinagko nga bookings bugti nga ang kantidad nga i-invest adunay makuha sa 10 ngadto 12 percent.
“Kung imong investment is P50,000 bali pag-abot sa usa ka bulan makakuha ka og P5,000,” matud ni Jey.
Dugang niini nga maayo pa kaayo ang dagan niini sa sinugdanan hangtod nga nag-invest na usab siya og dakong kantidad sa insurance niini nga FV E-care.
Sa kinatibuk-an moabot na ngadto sa P23 milyones ang iyang na invest ug sugod niadtong Agusto 2018 nitalbog na ang tseke nga ipadala kanila ug wala na usab mosulod sa ilang account.
Gipadalhan kini nila og demand letter ug nagpasalig nga bayaran sila ug ibalik ilang mga principal nga kantidad bugti nga dili sila manumbong apan wala gihapon kini nituman sa saad, ug ning bulan sa Enero dili na gyod hinuon nila kini makakita ug makakontak sa cellphone number niini lakip ang Facebook account niini.
“Among gikaulitan pod sa iyaha kay bisan wala na siya nagbayad sa amoa gasige pa siya og dawat og investor ug mao na isa sa among gipanawagan nga dili na magpabiktima,” dugang niini.
"Mura man siya'g Ponzi-like scheme kay nag-invest si A iyang gibayad kang B, ingon ana nga scheme," dugang pa nga pasabot niini.
Ang mga complainant gikuhaan na og affidavit sa NBI samtang ang maong ahensya nipasalig nga ila kining imbestigahan sa labing daling panahon human nasayran nga dili lang kini sila ang biktima apan duna pay anaa sa lain laing dapit sa nasod.
“Murag naa mi sa 100 ka tao ang iyang biktima ug sa among bana-bana moabot na sa P300 milyon ang wala niya giuli kon usahon tanan,” dugang niini.