GIPUSIL sa wala maila nga suspetsado ang usa ka negosyante ug pastor niadtong Miyerkules sa gabie, Enero 23, sa Barangay Tumpagon, dakbayan sa Cagayan de Oro.
Patay si Alberto Alperez, 50, taga San Lazaro, Barangay Lapasan, dakbayan sa Cagayan de Oro, kinsa nagdala pa sa mga baligya niini nga guso atol sa panghitabo.
Sa nahipos nga impormasiyon gikabutyag nga nakita pa kining biktima nga nilabay mga alas 5 sa hapon sa maong dapit apan pagbalik niini mga alas 7 sa gabii nihagsa na lamang human gipusil sa wala maila nga suspetsado.
Giingong duha ka mga buto sa wala masuta nga klase sa armas ang gigamit hinungdan nga nakaangkon ang biktima og samad sa iyang ulo ug dughan.
Padayon pa nga giimbestigahan sa kapulisan ang maong panghitabo. (KCS)