GI-AMBUSH ang van ni San Fernando Mayor Lakambini Reluya pasado alas singko niadtong Martes sa hapon sa Barangay Linao, Talisay City.
Ang van nga adunay license plate no. Y8687 nga gisakyan sa mayor girakrakan sa wa pa mailhing mga tawo diin tulo ka tawo ang nangamatay apil ang Bgy. Kapitan sa Panadtaran, San Fernando nga si Ricardo “Nonoy” Reluya, Jr., bana ni Mayor Reluya. Ang namatay presidente sa Association of Barangay Council (ABC) ug ex-officio member sa municipal council. Ang mayor gidala sa ospital kuyog sa duha ka laing mga biktima. Anaa na sila sa luwas nga kahimtang.
Si kinsa may buot mopatay kang Mayor Reluya? Di hinuon ikalimud nga anaay daghang makontra ang mga pulitiko apan maka-intriga kining maong hitabo kay duna na may pipila ka mga pulitiko sa San Fernando ang gipamatay. Daghang anggulo ang gisundan sa kapulisan apil na niini ang pulitika, personal nga away ug iligal nga drugas.
Nasayran nga ang igsuon ni druglord Franz Sabalones nga ni San Fernando Vice Mayor Fralz “BB” Sabalones wa magpapili pag-usab sa pagka-bise mayor. Ang kaatbang ni Mayor Reluya sa Mayo 13 nga eleksiyon mao ang negosyanteng si Ruben Feliciano samtang ang makaatbang unta ni Nonoy Reluya mao si kanhi mayor Antonio Canoy. Si Feliciano nakaaway sa magtiayong Reluya sukad pa sa 2017 tungod kay mi-isyu og executive order si Mayor Reluya nga naghunong sa pagpatuman sa international port project sa Barangay Sangat, San Fernando ni Feliciano. Misumbalik usab si Feliciano pinaagi sa pagpasaka og administrative case batok sa magtiaong Reluya sa Office of the Ombudsman-Visayas.
Niadtong miaging semana sa wa pa mahitabo ang pag-ambush kanila misugilon si Nonoy nga siya, iyang asawa ug ubang mga pulitiko sa ilang dapit anaa kuno sa listahan kon “kill list” sa ilang kaatbang sa pulitika. Ang mga Reluya sakop sa Alayon Party ni Mayor Eduardo Gulllas.
Ang Malacañang misugo na sa kapulisan nga sulbahon sa labing medaling panahon ang maong ambush. Mipakanaug gilayon og orden si Philippine National Police (PNP) Chief Director General Oscar Albayalde og gihatagan niya og duha ka semana ang Cebu Provincial Police Office (CPPO) director.