DI MOMINOS 13 ka mga trabahante ug mga nanginabuhi sa Cebu South Bus Terminal ang nagpositibo sa paggamit og shabu human sa kinalit nga drug test nga gipahigayon niadtong Miyerkules, Enero 23.
Si Jonathan Tumulak, manager sa CSBT, nibutyag nga sud sa duha ngadto sa tulo ka buwan nga temporaryo nga dili una pasudlon sa terminal ang mga nagpositibo.
Sa 13 nga nagpositibo nga pulos mga lalake, duha niini mga job order, tulo mga drayber, duha mga konduktor, duha mga helper, usa ang controller, duha ang vendors, ug usa porter.
Kinatibuk-ang 180 ka mga tawo ang gi-drug test sa Cebu Provincial Anti-Drug Abuse Office (Cpadao), 76 niini kay mga empleyado sa CSBT diin duha niini mga j.o. ug ang uban kay mga casual ug regular samtang 104 kay mga drayber, conductors, controllers, helpers, vendors ug porters.
Sumala ni Tumulak sa mga nagpositibo, pito niini ang niatubang niya ug niangkon nga kadaghanan nila nigamit og shabu niadtong besperas ug atol sa Sinulog.
“Kadaghanan nila nigamit kuno aron dili sila kapoyon. Ang uban nila, kiniat lang gyud,” sigon niini, kinsa nidugang nitug-an usab sila nga nipalit sa shabu gikan sa mga barangay Duljo ug Mambaling, eskina sa V. Rama Avenue ug atbang sa terminal.
Matod ni Tumulak, iduso niya ang pangan sa nagpositibo nga mga j.o. ngadto sa Human Resource Management Office sa Kapitolyo alang sa tukmang aksyon nga himuon.
Samtang, napahibawo na usab niya ang mga operator sa mga kompaniya og bus diin nangalagad ang mga nagpositibo sa paggamit og gidili nga drugas.