TINGALI duol sa 10 na ka higayon (o kapin pa gani) nga nisaksi ko sa Sinulog grand parade sakay sa usa ka float. Di god bida pero nagsakay pa gihapon.
Adtong Dominggo, sila si Melai Cantiveros, Jason Francisco, Empoy Marquez ug mga taga MLhuillier ang akong nakauban sa float sa kompaniya. Kusog ang suliyaw sa mga tawo kon motagad nila ang mga artista.
Niangkon sila si Melai, Jason ug Empoy nga kon silasila lang, motambong pa gihapon sila sa Sinulog. Nidali hinoon pagsumpay si Empoy nga ‘iba pa rin kung may MLhuillier, ang tulay ng paMLyang Pilipino’ nga nakapabahakhak namong duha.
Lahi ra gyud kuno ang Sinulog sa samang kalihukan sa ubang dapit kay sadya ug malinawon. Labaw sa tanan, mainiton ug mahigalaon ang mga Sugbuanon. Anà.
* * *
Di ikalimod nga dako ang ikatabang sa mga artista ug ubang maglilingaw sa pagpaalegre sa mga kalihukan sa Pista Senyor labina sa Sinulog grand parade.
Gidala sa duha ka higanteng networks aron paglingaw sa mga Sugbuanon ug mga dumuduong sa lainlaing lugar sa syudad sa Sugbo ug mga silingang dapit.
Ang Kapuso network nidapit sa mga sakop sa E-Group alang sa duha ka press conference. Nakatsika namo adtong Biyernes ang mga artista sa Kara Mia nga sila si Barbie Forteza, Mika dela Cruz, Jak Roberto ug Paul Salas ingon man sila si Kyline Alcantara ug Therese Malvar sa teleseryeng Inagaw na Bituin.
May pagkakatingalahan ang istorya sa Kara Mia pero nikuha kinig inspirasyon sa mga tinuod nga hitabo sa Inglatera ug India. Musikal ang Inagaw na Bituin.
Ang mga artista nipasundayag sa Gaisano Grand Mall Jai Alai Cebu City ug sa Ayala Center Cebu.
Pagka Sabado, silang Dingdong Dantes, Dennis Trillo, Solenn Heussaff ug Sanya Lopez sa teleseryeng Cain at Abel ang among natsika. Niangkon si Dingdong ug Dennis nga mosugyot sila bahin sa ilang papel ug dawaton usab kini sa mga direktor.
Mas ganahan si Solenn sa arts kay makapatuyang siya sa iyang gibati. Niangkon si Sanya nga NBSB (no boyfriend since birth) pero nipasalig siya nga babaye gyud siya. Wa pa lang gyud moabot ang iyang panahon.
Ang upat ang nitungtong sa Sinulog float sa GMA.
* * *
Karon nga nilabay na ang Sinulog, ang Chinese New Year na sab ang gilantaw sa mahiligon sa mga kalihukan ug kalingawan. Mosunod sab dayon ang Valentines Day. May dalit ang Star Cinema: pelikula ni Lisa Soberano ug Enrique Gil. Hisgutan ni nato sunod higayon.