UPAT ka mga kawani sa Mandaue City hall ang niduso og reklamo ngadto sa buhatan sa Visayas Ombudsman batok kang Mayor Gabriel Luis Quisumbing.
Ang mga kaso nga grave misconduct, oppression ug kalapasan sa Anti-graft and Corrupt Practices Act ang napasaka niadtong Nobiyembre 12, 2018.
Apan, kagahapon, Enero 24, na sila nipatim-aw sa mga sakop sa media human nga matod sa usa sa mga reklamante, si Damaso Tumulak, ang kanhi human resource officer sa Mandaue City Hall, nga nipagawas ang Ombudsman og kamanduan ngadto kang Quisumbing sa pagduso sa counter affidavit.
Lakip sa nipasaka og kaso mao si Andres Suson, ang kanhi assistant city engineer; Danna Jane Escalante, kanhi admin aide III sa HRMO; ug Florentino Dela Paz Jr., kanhi admin assistant sa City Sports Commission.
Si Tumulak nahimo nga plantilla isip HR officer sa City hall niadtong Enero 2016, si Suson isip assistant Engineer niadtong 2013, nahimo usab siya nga officer-in-charge sa City Engineering niadtong Enero 2016.
Si Escalante nagsugod isip job order employee, niadtong 2011 ug na-regular niadtong 2015. Florentino anaa na karon sa ika-10 ka tuig sa iyang serbisyo.
Nagsumikad ang reklamo niadtong Mayo sa miaging tuig human sila si Tumulak ug Suson ang gitudlo nga modumala sa Umapad dumpsite taskforce uban nila ni Escalante ug Dela Paz.
Si Tumulak ug Suson ang ningreklamo sa ngadto sa Civil Service niadtong Hunyo sa miaging tuig sa rason nga wala masubay sa ilang angay nga trabaho ang gitagana kanila.
Ug bisan nga wa pa nipagawas og resolution ang Civil Service, gibalik nila ni Tumulak ug Suso ang ilang kaugalingon sa kanhi nila nga posisyon.
Gawas niini, lima ka bulan nga wala sila nakadawat sa ilang mga suweldo, matod pa.
“Unlike sa uban nga mo-file sa kaso mopa-media dayon, disclose everything, kay gamiton nga propaganda, pero kini amo this is totally out from any partisan politics.. Di mi gusto maapil-apil ning politiko, mao gitago namo ni, pero karon di naman gyud sad mahimo, kay sama anang wa pirmahi ang among notice of salary adjustment, nya among mga bunos, mid-year bonus,” matod ni Tumulak.
“Usa sa mao, is nahadlok mi sa among seguridad, kay kahibaw mi among kontra daku og posisyon, karon election ban na, misamot mi og kahadlok unsa pay possible nga ilang mabuhat’, pagpasabot usab ni Escalante sa Superbalita Cebu. (FMD)