UPAT ka high profile drug personalities nga mga napriso sa Mandaue City Jail, ang kapila ka higayon na nga nikanselar sa mga pagdungog sa ilang mga kaso.
Gani, usa kanila sa dihang gipatawag sa Jail Warden Jessie Calumpang sud sa iyang buhatan, giingong nga nagkurog sa kahadlok nga niangkon nga gipakanselar sa iyang abogado ang hearing sa iyang kaso.
Kini human nga sunod-sunod ang mga nahitabo nga ambush. Ilabi na sa mga naglambigit sa mga piniriso nga adunay kasong may kalambigitan sa ginadiling drugas nga padung unta motambong sa ilang hearing.
Sa upat, duha niini mao ang usa sa mga pangulo sa Sadaya drug group.
“Sort of nagpanghadlok na sila, labi na sad nga kada naay madakpan sa drugs, ilang mga pangalan ang mogawas nga source daw sa drugs. Magkurog sila makakita nga moari ang mga pulis, kanang makig-coordinate nato, kon si kinsa ning tawhana nga ginganlan sa ilang dinakpan nga inmate diri,” matod ni Calumpang.
Dugang sa nakapahadlok nila ang nahitabo usab sa kontrobersyal nga drug lord sa Sugbo nga si Steve Go, kinsa gipusil-patay sa iya ra kaubanan nga piniriso niadtong Hunyo 20, 2018 sulod sa Mandaue City Jail.
Giingong gipanguyawan na ang mga pinirisong drug personality nga ma-ambush ang sakyanan nga ilang sakyan padung sa korte.
Pipila na ka mga nahitabo nga pagpamanhig sa sakyanan sa Bureau of Jail Management and Penology (BJMP) sa dakbayan sa Talisay, niadtong Hulyo 2018.
Diin patay ang tulo ka mga piniriso nga padung motambong og hearing sa kasong may kalambigitan sa ginadili nga drugas.
Septiyembre 2018 gihapon patay diha-diha, lakip ang nagmaneho nga si PG1 Joel Teves ug ang escort nga si PG1 Bernie Bayutas nga naa sa front seat sa van ug ang piniriso nga si Jeffreyfer Peregrino nga dunay kasong pagpayuhot sa ilegal nga drugas.
Si Peregrino napriso sa Cebu Provincial Detention and Rehabilitation Center (CPDRC).
Ug ning bag-uhay lang, niadtong Enero 9, 2019, patay usab ang kanhi sinaligan ni Franz Sabalones, giila nga drug lord, nga si Tocelio Ababon, luwan sa PNP Patrol car sa dihang gibanhigan kini samtang nagpadung nga motambong sa court hearing sa lungsod sa Argao.
Swerte nga nakasul-ob og bulletproof vest ang nagmaneho sa patrol car nga si PO3 Ruel Patalinghug ug kauban nga si PO3 Crescenciano Alajid, mga sakop sa Provincial Intelligence Branch (PIB).
Dugang ni Calumpang nga halos hapit na lang makahilak ang maong mga piniriso nga mohangyo nga di na sila ipugos sa pagtambong sa hearing sa ilang kaso, diha lang sila sa bilangguan.
Pasabot usab ni Calumpang nga dili usab sila makapamugos nga paadtuon sa hearing sa ilang kaso ang maong mga piniriso, kon napakanselar o na-reset na sa ilang mga abogado.