MIPABAHA og 61 puntos si James Harden nga maoy iyang career-high sa dihang gipatapsingan sa Houston Rockets ang New York Knicks, 114-110, sa National Basketball Association (NBA).
Niini, natupngan ni Harden ang record nga nahuptan ni Kobe Bryant nga nakulit gihapon didto sa Madison Square Garden sa New York.
Siya usab ang miaswat sa Rockets ngadto sa kadaugan sa katapusang 3.8 segundos nga nahabilin sa duwa pinaagi sa iyang hansak sa dihang nakamugna og krusyal nga turnover ang Knicks. Kini mao usab ang ikalimang higayon nga nakakulit siya og 50 puntos o kapin sa usa ka duwa.
Kagahapon, nag-ungaw na unta sila sa kapildihan, apan sa kalit lang misilaw ang ilang paglaom human mipabuto og tres si Eric Gordon, sa katapusang 9.8 segundos.
Sa sayo pa, naapsan sa kasamtangang leading scorer si Wilt Chamberlain sa ikaupat nga dapit sa kasaysayan nga nakahimo og 30 puntos sa 21 ka sunodsunod sa ka mga duwa.
Gawas sa iyang 61 puntos, milangkat pa gyud siya og 15 ka rebounds sa maong kadaugan alang sa ilang 27-20 nga baraha nga nihaom sa ikalimang puwesto.
Samtang sa laing bahin, nakaangkon og seryusong bali sa iyang tuo nga tuhod si Victor Oladipo sa Indiana Pacers sa dihang ilang napildi ang Toronto Raptros, 110-106.
Maayong pagtagak sa sawog ang All-Star guard sa nahabiling 4:05 segundos sa second quarter sa dihang midepensa kini sa outlet pass ngadto ni Pascal Siakam sa Toronto.
Kusog ang impact sa maong insidente ug gani ang mga trainers daling mitabon og tualya sa iyang tiil ug halos tanang players mipalibot kang Oladipo samtang diha pa kini sa sawog.
Way replay nga gipakita sa video screen ug ang fans mipalanog sa iyang pangan nga namarog, pakita sa ilang suporta.
Gisakay siya sa stretcher pagawas sa arena. Gipahibawo sa mga team officials ipaubos sa MRI sa si Oladipo.
Samtang sa laing bahin, wala man tuod si Kyrie Irving apan sa gihapon gikulata og sakto sa Boston Celtics ang naghingutas nga Cleveland Cavaliers, 125-103.
Si Terry Rozier mitali og 26 puntos, 22 niini sa first half aron pangulohan ang Boston sa ilang ikalimang sunodsunod nga kadaugan. Si Irving gihilantan.
Gipildi sa Brooklyn Nets ang Orlando Magic, 114-110 samtang gipabugnaw sa Los Angeles Clippers ang kainit sa Miami Heat, 111-99. Muna sa ginhawa nga nabuntog sa Philadelphia 76ers ang San Antonio Spurs, 122-120 ug gibali-balian og sungay sa Atlanta Hawks ang Chicago Bulls, 121-101.
Gisurprisahan usab sa Charlotte Hornets ang Memphies Grizzlies, 118-107 ug ang Detroit Pistons mipakaging sa New Orleans, 98-94. (JBM)