Libreng plete sa e-jeepney

SULOD sa usa ka semana makapahimulos ang mga Oponganon sa libreng sakay sa E-Jeepneys atol unya sa paglusad sa maong solar-powered jeepneys sunod buwan.

Gipahibawo sa chairman sa United Drivers Operators Transport Cooperative (UDOTCO), Malvin Arias, nga sa Pebrero 8, ilusad ang E-jeepney timaan nga sugdan na kini sa pagpamasahero.

Kini kabahin sa PUV Modernization Program sa Department of Transportation (DOTr).

Gikan sa Pebrero 8-14, mohatag og libre nga sakay sa mga pasahero nga molibot sa rota sa Mactan Circumferential Highway ug laing rota paingon sa lungsod sa Cordova.

Matod pa ni Arias nga adunay 25 ka units sa E-jeepney ang magdagan ug laing 25 ang idugang sa Marso.

Sa Abril makompleto ang 100 ka E-jeepneys.

Kadto lang drivers nga miyembro sa UDOTCO ug nipa-ubos sa Driver’s Academy Seminar sa Land Transportation Franchising and Regulatory Board (LTFRB) nga ipahigayon sa Enero 29 ang hatagan og prebilihiyo nga maka-operate sa E-jeep.

Ang drayber ug konduktor sa E-jeep magdawatan og suholan sa kooperatiba sa ilang walo ka oras nga pagpamasada.

“Bahinon na sila (drayber) sa duha ka shifts. Magsugod sa 4:00 am ngadto na sa 1 pm ug naay 2 pm paingon sa 11 pm,”matod ni Arias.

Samtang si Mayor Paz Radaza, sa iyang na-unang pamahayag, niingon nga wa kini magpasabot nga kulban sa panginabuhian ang mga traysikol drayber.

Makapadayon sila sa ilang pagpamasahero sa barangay o interior roads.

Ang karaang PUJ terminal sa Barangay Pajo magsilbing holding bay sa mga E-jeepney nga adunay minimum fare rate base sa gipatuman sa LTFRB. Si Johnny Barolas, traysikol driver nga nagbiyahian sa Sityo Sangi, Pajo – Poblacion vice versa, wa mabalaka sanglit makapadayon sila sa pagpamasahero sukwahi sa nanggawas nga taho nga i-phase out ang mga traysikol.