Bisan kon gidudahan ang pipila ka mga pulis nga giingong mga protector, ang Talisay Police Station (TPS) ang nag-una sa 50 ka mga police station sa lalawigan sa Sugbo nga dunay kinadaghanan og nahimo nga mga operasyon batok sa gidili nga drugas sa miaging 2018.
Sud sa usa ka tuig, ang Talisay PS ang nakapahigayon og 350 ka mga anti-illegal drug operation diin 482 ka mga tawo ang nangasikop ug 515 ka mga kaso ang napasaka ngadto sa korte.
Ang Talisay PS mao usab ang nakasakmit sa labing dako nga balor sa gidili nga drugas nga mokabat sa P21.6 milyones.
Apan sa maong siyudad usab ang dunay labing daghang napatay sa maong mga operasyon nga niabot og 22 ka tawo nga gidudahang nalambigit sa illegal drugs.
Ang Danao Police Station nga naa sa ikaduha nga may 279 ka mga operasyon nga nahimo, mao ang nakatala og labing daghang mga nasikop nga niabot og 516 ug dunay kinadaghanang nasang-at nga mga kaso nga 520.
Ikatulo ang Carcar Police Station nga nakahimo og 171 ka mga operasyon diin 188 ang mga nangadakpan, P1.7 milyones ang gibanabanang kantidad sa nasakmit nga illegal drugs ug 330 ang napasaka nga mga kaso.
Gikan sa Enero hangtod sa Disyembre 2018, ang CPPO dunay kinatibuk-ang nakasakmit og P152.8 milyones nga balor sa illegal drugs sa 2,349 ka mga operasyon diin 3,236 ka gidudahang drug personalities ang nangasikop ug 4,187 ang mga kaso nga napasaka ngadto sa mga hukmanan samtang 10,902.1 ka gramos ang nasakmit.SCG