Namutbot nga gidagit, kasohan

MAG-ATUBANG og kaso ug posibleng pagkataktak sa trabaho ang usa ka personahe sa City Transport and Traffic Management Office (CTTMO) kinsa gitaho sa iyang pamilya nga nawala.

Apan sa gihimong imbestigasyon nasayran nga namakak kini aron ipalutaw nga gidagit.

Si Rahman Guiamad gitaho sa iyang anak babaye nga nawala niadtong Enero 14, pinaagi sa pag-post sa iyang Facebook page sa Davao City.

Atol sa Ispeak media forum Huwebes, Enero 24, si CTTMO chief Dionisio Abude nagsulti sa mga tigbalita nga si Guiamad naa na karon sa kustodiya sa Sta. Cruz Municipal Police Station alang sa dugang imbestigasyon.

"So nahibal-an namo nga at the time sa paglakaw niya, naa siyay P120,000 nga cash, dapat mogawas na sa investigation. Kani kay mora'g ilukat sa colorum nga nadakpan," tug-an ni Abude.

Matud ni Abude nga posibleng si Guiamad nagwaldas sa kuwarta sa sugal. Niadtong adlawa, dugang pa niya, iyang gibalhin ang iyang pamilya ngadto sa Cotabato City apan nadakpan sa mga pulis.

Si Guiamad posibleng palagputon ug mag-atubang og kaso nga ipasaka sa mga awtoridad tungod sa pag-imbento og istorya nga siya gidagit ug nituo ang puwersa sa kapulisan ug ang tibuok rehiyon.

"Conditioning lang man 'to. Gipagawas sa Facebook aron kami tanan makabalo mi nga nawala siya. Aron ni pag-abot sa maningil, isulti lang nga nawala ang kuwarta," tin-aw ni Abude.

Giesplikar ni Abude nga ang unang elemento sa kidnapping kinahanglan nga ang nagdagit maoy manawag sa pamilya aron nga ipadayag ang intensiyon ug ang ilang gipangayo.

Apan kini sukwahi sa bahin ni Guimad sa dihang siya mismo ang nagpadala sa iyang kaugalingong text message ngadto sa pamilya nga nag-angkon nga siya gidagit.

Ikaduhang elemento mao nga pahimangno kini sa pamilya nga di isulti sa mga awtoridad o pasidaan ug hulga nga di ilambigit ang pulis apan sukwahi sa nahitabo.

Laing sinyales mao nga way nakitang komosyon o kasamok sa lugar nga iyang gibantayan.