Pacquiao, 40, sikat gihapon

WALA lang gipamatuod ni Manny Pacquiao nga anaa pa gyud siyay igong katakos ibabaw sa ring sa iyang pagdominar ni Adrien Broner niadtong Dominggo didto sa MGM Grand Garden sa Las Vegas, kon dili iya pa usab gipakita nga usa gihapon siya sa mga boksidor nga daghan ang nagsunod o motan-aw sa mga away.

Mga tinubdan mikompirmar sa Yahoo Sports nga ang final tally sa pay-per-view sa maong away moabot ngadto sa 400,000, nga labaw og 25 porsiyento kon itandi sa iyang uwahing pay-per-view fight.

Sa iyang kadaugan batok ni Jessie Vargas niadtong 2016 sa Thomas & Mack Center sa Las Vegas, ang PPV miabot og 300,000.

Si Pacquiao mao gihapon ang ikaduhang pinakataas og kita sa PPV sa kasaysayan, sunod ni Floyd Mayweather Jr. Ang ilang away niadtong 2015 mikita og 4.6 million sa PPV ug hapit moabot og $600 million ang gross revenue.

Ang iyang away batok ni Broner niadtong Dominggo, nga gituohan nga moabot lang og 325,000 ngadto sa 350,000 ang PPV, gibanabanang moabot og $30 million.

Sa maong away aduna siyay guaranteed nga premyo nga $10 million ug madugangan pa kini sa kita sa pay-per-view.

Kini nagpamatuod lang ngadto ni Mayweather nga si Pacquiao pabilin nga sikat ug popular lang gihapon ug hayan nga kon mahitabo ang ilang rematch, gituohan nga mokita gihapon kini og dako bisan pa man sa ilang edad.

Si Pacquiao, nag-40 anyos na niadtong Disyembre samtang si Mayweather motangkod sa edad nga 42 sunod buwan.

Giingon nga miabot sa 13,025 ka mga tawo ang misaksi sulod sa MGM Grand. Ang tanang tiket nahurot og kahalin, pagbutyag sa promoter. (JBM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph