GISUBHAN og kadaugan ang Team KR ug UV sa pagsugod sa 2019 Mayor’s Cup Sinulog Beach Volleyball tournament nga gipahigayon sa Fort San Pedro sand court, sa Plaza Independencia, Pier 1 dakbayan sa Sugbo.
Ang panagparis nila ni Chris Roy Guzman ug Krung Arbasto sa University of Sto. Tomas yanong midabo-dabo sa University of Cebu sa duha ka sets, 21-12, 21-9, alang sa impresibong pag-abli sa ilang kampanya sa upat ka adlaw nga torneyo.
Si Guzman, produkto sa USJ-R ug Arbasto maoy kampiyon sa 2016 UAAP beach volleyball.
Ang duha ka Manila-based players nakapakita na og akisyon sa Beach Volleyball Republic (BVR) ug sa Philippine Superliga (PSL) ang mianhi sa Sugbo.
Apan ila kining giuswag sa dihang ilang nahibaw-an nga adunay beach volleyball tournament ug nakahukom nga mosalmot sa panagtigi.
Ang UV nga gilangkuban nila ni John Kevin Juban ug Raph Abanto ang wa usab magpalupig sa unang adlaw sa kompetisyon. Ila usab nga napukan ang USP-F sa straight sets, 21-16, 21-9.
Ang tournament nga giorganisar sa Cebu City Sports Commission (CCSC) ug sa Cebu Spikers Volleyball Club, gisalmotan sa 16 ka mga teams - 10 sa men’s division ug unom sa women’s class.
Ang kampiyon makaangkon og P20,000 nga ganting salapi samtang P15,000, P10,000 ug P5,000 sa second, third ug fourth placers. R(SC, JBM)