TEAM leader sa Prevention, Restoration, Order, Beautification, Enhancement (Probe) gipusil sa nagbinugtong nga gunman pasado alas 5 sa Huwebes, Enero 24, sa dalan MJ. Cuenco, Barangay Tejero, Siyudad sa Sugbo.
Si Arnulfo Cadungog, 57, alyas Anul, taga Villagonzalo 2, nakaangkon og samad pinusilan sa iyang apapangig.
Si Arnulfo manghod sa kontrobersyal nga kanhi kapitan sa barangay nga si Jessielou Cadungog, kinsa nialigar nga ambuson unta sa usa ka pulis.
Sigun sa usa ka 10 anyos nga batang lalake nga sa dihang padung na siya sa barangay hall, namidpid siya sa dalan MJ Cuenco luwan sa iyang bisiklita.
Iya pang nasugatan si Arnulfo nga padung na mopauli sa ilang balay gikan sa trabaho.
Iya usab nga nabantayan ang gunman nga nag sul-ob og itom nga tshirt nga nag taptap sa nawong nga sakay sa motorsiklo.
Ang gunman nagsunod kang Arnulfo, nikanaog dayong kuha sa giloklok sa hawak nga armas ug nipusil kaniya makausa ka higayon.
Human sa pagpusil, nibalik pagsakay ang gunman sa iyang motorsiklo ug nibuylo pagpadagan paingon sa Lorega.
“Nag bike ko. Padung ko sa barangay. Nihunong ko ba kay na flat man akong bike. Mao to akong nakita nga mihunong ang motor nya iya dayon gipusil (si Arnuldo). Mao to nahagba na,” sulti ni Rico (di tinuod nga ngalan).
Si SPO1 Alvin Itona, sakop sa Waterfront police station, nitug-an nga dali nga gisakay sa ambulansya sa Emergency Medical Services (EMS) sa Siyudad sa Sugbo aron dad-on sa usa ka pribadong tambalanan sa syudad sa Sugbo.
Padayon pa ang ilang pagsusi kon unsay motibo sa krimen kon kini may kalabutan ba sa iyang trabaho isip sakop sa Probe.
Si Racquel Bohol Arce, pangulo sa Probe, nagtuo nga adunay kalabutan ang pagka sakop sa Probe team ni Cadungog sanglit niadtong Miyerkules aduna silay gihawanan nga sidewalk sa sitio Silangan 2, Barangay Tinago.
Si Cadungog ang team leader niadtong tungora. Giingong nakadawat na silag hulga sa kinabuhi tungod sa ilang gipang demolish nga panimay ug mga estraktura sa syudad sa Sugbo.
Sa pagsuwat ning balita, padayon pa nga gitabang sa pribadong ospital si Cadungog.