Sunog giimbestigahan

MGA sakop sa Bureau of Fire and Protection sa lungsod sa New Bataan lalawigan sa Compostela Valley (Comval) Province ang padayon pa karon sa paghimo og makuting imbestigasyon kalabot sa nahitabong sunog niadtong Huwebes sa gabii nga midanyos ug kapin P5 milyones.

Sa report nga nahagpat sa Superbalita nasayran nga pasado alas 9:45 sa gabii nagsugod ang kayo gikan sa balay nga gipanag-iyahan sa usa ka Lilian Dolotina sa may Barangay Poblacion susamang lungsod.

Tungod sa paspas nga pagkuyanap sa kayo lakip nga nasunog ang 13 ka mga kasigbit panimalay nga gipanag-iyahan nila Renato Labrador, Manuel Bugsad, Bernardo Mendoza, Andrea Paclibar, Rosalio Barrete, Dionesia Cabornia, Leonila Parojinog, George Lerin, Maria Fe Laison, Liza Mamac, Jojit Cutamora, Sanny Pandapatan ug Lilian Dolotina.

Abtik sab nga nakaresponde ang kabomberohan nga gikan pa sa dakbayan sa Tagum, lungsod sa Montevista, lungsod sa Nabunturan, ug uban pang lugar aron magtinabangay sa pagpawong sa kalayo.

Pasado alas 12:00 na sa tungang gabii nakontroral ang sunog ug nakonsiderang fire out ang dapit.

Migawas sa inisyal nga pakisusi sa mga arson investigator nga napasagdang kandila gikan sa balay ni Dolotina ang hinungdan sa sunog.

Hinuon way gikatahong namatay sa nahisgutang sunog.

Gawas lamang kang Dolotina nga nadala sa ospital human napaso.

Mga otoridad sa lungsod sa New Bataan mihimo na og dugang pakisusi sa nahisgutang hitabo. (Marvin Pineda)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph