USA ka lalaki ang gisikop human nasakpang naghupot og klase-klaseng mga armas didto sa Barangay San Vicente, dakbayan sa Panabo.
Ang dinakpan nailhan nga mao si Juan Bacalso, hamtong ang panuigon, molupyo sa susamang dapit.
Sa nahagpat nga report gikan sa blotter sa kapulisan nasayran nga pasado alas 6:30 sa gabii niadtong Miyerkules, nasikop sa mga sakop sa kapulisan ang suspek didto sa dapit.
Nasakmit gikan sa dinakpan ang usa ka Colt rifle nga dunay serial number 9038342, may usa ka magazine nga puno og bala ug kalibre 5.56 mm nga pistola ug samurai.
Ang dinakpan gidala dayon ngadto sa presinto sa kapulisan aron maimbestigahan.
Samtang kasong illegal possesion og firearms ang gihikay sa kapulisan batok sa suspek.
Samtang sa pikas bahin, usa sab ka lalaki ang gisikop human nasakpang nagdala-dala og sundang sa may Freedom Park sa susamang siyudad.
Ang dinakpan mao si Jimboy Camawillan, 25, molupyo sa Barangay Datu Abdul, dakbayan sa Panabo.
Sa report nasayran nga pasado alas 11:00 sa gabii nasikop sa usa ka sakop sa Panabo City Auxilliary Group PCPAG nga si Joxson Caballero si Camawillan human nasakpang nagdala-dala og likong sa nahisgutang dapit.
Ang dinakpan nasikop luyo sa gilusad nga "Oplan Sita" sa mga otoridad.
Ang dinakpan gidala dayon sa presinto sa kapulisan aron maimbestigahan. (Marvin Pineda)