GIHUGTAN na sa kapulisan ang seguridad sa lalawigan sa Davao del Sur dungan sa pagsaulog sa Valentines Day karong adlawa.

Kini aron nga way si bisan kinsa nga makahimo og pagpanabotahe sa selebrasyon ilabi na kay ika-unom na karon ka tuig sa paghandom sa Valentines Day bombing nga nahitabo niadtong 2005 didto sa kaulohang Manila, siyudad sa Davao ug General Santos.

Kahinumdumang 11 ang namatay ug 93 ang nasamdan sa tulo ka managlahing pagpamomba nga nahitabo sa maong tuig.

Ang Davao del Sur Provincial Police Office (DDSPPO) nagmando sa tanang hepe sa kapulisan nga mas pakusgan pa ang ilang intelligence monitoring aron paspas nga matubag sa ilang buhatan ang bisan unsang hulga sa seguridad.

Didto sa lungsod sa Bansalan, Davao del Sur, nipataas ang kapulisan sa ilang alerto human gikataho nga pipila ka sakop sa mga rebeldeng New People's Army ang anaa sa Sitio Balutakay, Barangay Managa sa lugar.

Ang mga rebelde gikataho nga nihimo pagpaboto sa ilang armas ug gituohang usa kini ka pagpanghuraw sa mga sakop sa Citizens Armed Forces Geographical Unit (Cafgu) nga nakabase sa ubos nga parte sa lugar.

Dungan niini, nagpahimangno sab ang kapulisan ngadto sa mga kaigsuonang Filipino-Chinese nga nia sa lalawigan sa paglikay sa paggamit og bisan unsang matang sa mga paboto alang sa pagsaulog sa Chinese New Year karong adlawa.

Si Senior Superintedent Ronald dela Rosa, provincial police commander, nag-awhag sab sa iyang mga ginsakpan nga mohimo og pagpatrolya sa mga barangay aron lantawon ang sitwasyon sa palibot. (Dondon Dinoy)