NATUMBOK na sa Philippine Drug Enforcement Agency (PDEA) sa Autonomous Region in Muslim Mindanao (Armm) ug kapulisan ang mga tawong nagpaluyo sa ginadiling druga sa siyudad sa Cotabato.

Bag-uhay lamang mihimo og buybust operation ang hiniusang puwersa sa PDEA-Armm, Task Group Tugis ug City PNP sa Mother barangay Bagua alas 7:00 sa gabii, Biyernes.

Sa maong operasyon malampuson nilang nadakpan ang upat ka drug pusher nga nailhang sila Elixer Siang, Alvin Katug, Raymund Edres ug Amircan Datumanong.

Nakuha gikan sa posisyon sa upat ang ubay-ubay ka mga shabu, mga kagamitan sa druga, marked-money nga gigamit sa otoridad.

Matud ni PDEA ARMM Regional Director Brian Babang nga ang mga druga nga naghitak sa Central Mindanao naggikan sa Zamboanga City ug Metro Manila.

Ila sab nga gisuta karon ang taho nga may shabu laboratory sa usa ka hilit nga dapit nga nahimutang sa utlanan sa Maguindanao ug Lanao Del Sur.

Giklaro sab ni Cotabato City Police Director Senior Superintendent Willie Dangane nga ang upat ka suspek nalambigit sa robbery hold-up ug gun for hire.

Gisang-at na batok sa mga dinakpan ang kasong paglapas sa Republic Act 9165 o Dangerous Drug Act.

Sila gibalhog karon sa selda sa PDEA-Armm og padayong gi-imbestigahan aron mailhan ang ilang mga kaubanan nga nalambigit sab sa pagpamaligya sa ginadiling druga. (Edgardo Fuerzas)