TRABAHANTE sa peryahan diha sa barangay Ibabao Dakbayan sa Mandaue ang patay diha-diha dayon, human pusila sa makadaghan nga higayon sa iyang nawng ug sa ulo, alas 11:35, Huwebes sa gabii, Enero 24.
Ang biktima giila nga si Marlon Yongco Malazarte, 44 anyos, minyo, ug residente sa Zone Cagape, Brgy. Paknaan, Mandaue City.
Si Malazarte ang giingon nga busy sa pag-atiman sa mga tawo nga buot modula sa games sa peryahan, sa dihang usa ka lalaki ang kalit lang niduol kaniya dayon pusil kaniya kapila ka higayon.
Ang mamumuno ang dali usab nga nisibat sakay sa nagpaabot nga motorsiklo.
Gitug-an ni Police Senior Supt. Julian Entoma ang Director sa Mandaue City Police Office, nga may kalambigitan sa ginadiling drugas o personal nga bangi diha sa iyang panarbaho.
Gipasabot ni Entoma nga anaa sa drug watchlist sa Police Station 5 (Opao police Station) sa MCPO si Malazarte sukad pa 2016, apan giingon nga halos wa na kini igkita sa ilang lugar.
Si Malazarte usab ang giingon nga tig-supply og drugas sa mga gagmay nga street pusher. Gikan sa Villagonzalo sa Dakbayan sa Sugbo ang giingon nga kuhaanan sa supply ni Malazarte.
"Dugay na ni siya gipangita sa Station 5. Sukad naa ni sya sa watchlist, kanunay na kini magbalhin-balhin. Wa sad kahibalo ang Station 1 (Centro police) nga anaa ni sya sa watchlist sa 5. Sa pagkahitabu ani niya na gabii, pag-background check diha na nakita, nga naa gani ni siya sa directorate for intelligence, so hardcore ni siya. Mao lage na if di madakpan, mahibaw-an na lang nato patay na. Ato sad gitan-aw sa pag.manage niya diha sa peryahan, wa ba ni siya nakontra," gitug-an ni Entoma sa Superbalita Cebu.
Nakuha sa crime scene ang tulo ka mga kabhang ug usa ka cartridge sa wa pa matino nga armas.