DUNA nay mga suspek nga gisundan karon ang otoridad nga gitumbok nga maoy mibanhig patay sa Area Coordinator sa Liberal Party sa probinsiya sa Cotabato.
Biktima giila sa otoridad nga si Edwin Bandila, 49 anyos, minyo, negusiyante, molupyo sa barangay Poblacion, Carmen.
Samdan sab ang iyang asawa nga si Dolores.
Sa taho gikan Cotabato Police Provincial Office, nasuta nga alas 4:40 sa hapon, Pebrero 12, nahitabo ang pagpamanhig.
Samtang sakay ang mga biktima sa ilang XRM nga motorsiklo gikan sa ilang paryente sa barangay Ugalingan pauli na unta sa ilang bay, apan pag-abot nila sa Carmen cemetery kalit nga mibutho ang duha ka wala mailhing suspek, dayon sila gipamusil gamit ang .45 nga pistola.
Patay on the spot si Bandila nga naigo sa iyang ulo ug dughan samtang ang iyang asawa bisan samaran nakahimo pa sa pagdagan paingon sa luwas nga dapit ug maoy nangayo'g pakitabang sa mga sibilyan nga maoy midala kaniya sa Kabacan Medical Specialist, diin luwas na siya sa makuyaw nga kahimtang.
Matud ni Dolores, nga sa wa pa nahitabo ang insidente, ubay-ubay ka mga hulga na ang nadawat sa iyang kapikas gikan sa wala mailhing grupo.
Nagtuo si Cotabato Police Provincial Director Senior Superintendent Norberto Batislaong nga posibleng politika ang motibo sa pagpatay sa biktima.
Gipamahayag ni Cotabato Vice-Governor Manny Pi¤ol nga timailhan lamang kini nga nagsugod na ang hugaw nga klase sa pamolitika sa probinsiya.
Mihangyo sab kini sa kapulisan nga hingusgan ang ilang imbestigasyon aron mahatagan og hustisya ang kamatayon ni Bandila. (Edgardo Fuerzas)