TULO ang nangapriso sa detention cell sa Mandaue City Police Office headquarters nga mga taga dakbayan sa Sugbo, usa nila babaye, human makuhai og shabu nga gibana-bana nga mobalor og P250,000.
Mga suspek giila nga sila Jeffzy Betasolo, 19, taga Barangay Alaska, Mambaling; hinigugma niini nga si Rose Ann Gabuya, 20, taga Inayawan, ug si Robert Manapsal, 24, taga Vilagonzalo 1, Barangay Tejero.
Sila nasikop sa buy bust operation sa drug enforcement unit sa MCPO alas 11:45 Huwebes sa gabii, Enero 24, sa Dan FF Cruz, Barangay Subangdaku.
Matod ni Entoma nga ang grupo gitudlo nga maoy kuhaanan sa drugas sa pipila na ka mga dinakpan sa Syudad sa miaging anti-drug operations.
Nakuha gikan kanila ang tulo ka medium pack sa gidudahan nga shabu nga adunay gibug-aton nga 35 gramos, mga cellphone ug motorsiklo.
Giangkon ni Betasolo ila ang nakuha nga shabu, apan giingon nga igo ra usab sila nga nasuguan sa paghatud.
“Igo raman mi gisugo ana. Wala may apil akong uyab. Nikuyog ra to siya namo kay mamalit mi og bag para niya.Duha ka bulan pa ko. Sa una tagaan mi og P2,000 (sa paghatud),” pag-angkon ni Betasolo sa Superbalita Cebu.