GIILA nga usa ka high value target sa Talamban police Station ang nadakpan sa gihimong buy bust operation sa Barangay Pit-os nga nakuhaan sa kapin usa ka milyon ka pesos nga balor sa shabu.
Ang nasikop giila nga si Lyle Leyson 22, nga taga Proper Pulangbato sa Syudad sa Sugbo nga maoy target sa buy bust operation sa kapulisan nga gipangulohan ni Police Chief Insp. Elisandro Quijano.
Lakip sa nadakpan ang iyang batabata nga si Edwin Balasabas 20, nga taga Sitio Tabok, Barangay Pit-os.
Nakuha gikan kanila ang napulo ka pakete sa gituohang shabu nga motimbang sa 153.53 gramos nga mobalor og P 1,0043,000.
Matod ni Chief Insp. Quijano nga nalakip sa watchlist sa barangay Pit-os ang mga dinakpan ug kanunay nga manganlan kung adunay mga nalambigit sa illegal nga drugas nga masikop.
Tungod niini, milusad silag tulo ka semana nga surveillance hangtod mga pasado alas 9 sa gabii, Enero 24 ila na nga gipahigayon nga buy bust operation.
Giangkon matod pa ni Leyson nga ang naghatag kaniya sa illegal nga drugas mao ang usa ka drug personality nga naa pa sa Cebu City Jail.
Giingong manawag kini kaniya aron idispose ang binulto nga illegal nga drugas diin ang tanang mountain barangay iyang area sa distribution sa illlegal nga drugas.
Mas midaghan karon ang supply sa dinakpan tungod sa nagsunod-sunod nga kapistahan sa bukid nga siya usab ang mo supply sa mga street pusher.