IHAWAN sa kagamhanan sa dakbayan sa Mandaue, ang hingpit na nga gipasirad-an, Byernes alas 6 sa buntag, human usab nimandu ang Environment and Management Bureau kon EMB-7 og closure order niini.
Usa ka memorandum nga pagpahunong sa operasyon sa ihawan ang gipatapot diha sa gawas sa pasilidad sa slaughterhouse, sa barangay Labogon. Pinirmahan kini ni Mandaue City administrator, Atty. Danilo Almendras.
Matud ni Almendras nga sa Hulyo sa niaging tuig, human sa gihimo nga inspection nihatag na og warning ang EMB-7 nga pasirad-an kundili mapaayo o mabutangan og laing waste water treatment facility ang ihawan, ilabi na nga duol kini sa dagat.
Pipila ka mga kompanya na ang gikonsulta sa kagamhanan aron sa pagpa-ayo niini, apan hangtud sayo ning tuiga, sa subling pag-inspection sa EMB7, nimandu na gyud kini alang sa pagpasirado.
Hinungdan nga ang pito ka mga mang-ihaway og baboy diha sa slaughterhouse alang unta sa ilang ipangbaligya, ang napugos na gyud karon sa pag-undang.
Gipasabot ni Almendras nga gawas sa waste-water treatment, guba usab ang boiler, hinungdan nga manu- manu ang pagpainit sa tubig. Iya usab gihulagway nga alkansi usab ang kagamhanan, kay ubos ra ang 30 mil kada bulan nga kita niini, ikompara sa dul-an usa ka gatus ka libo ka pesos nga bayrunon sa Syudad.
Hinuon, matud ni Almendras nga usa sa plano ni Mandaue City mayor Luigi Quisumbing nga ipatan-aw og balik ang ihawan sa City engineering ug ipatino kon pila gyud ang magasto sa kagamhanan kon i-rehabilitate kini lakip na ang pagpalit sa waste-water facility.
“Based on the recommendation of the EMB, last year ila na gi-inspect unya sa ilang findings, daku gyud nga factor ang absence of waste water treatment facility, but ang report ato nakuha, duna, but wa lang ni- function. Kay kon wa na ang waste water treatment, asa man padung ang agay-ay? Kon atong sutaon, supposed to be economic enterprise unta na, but it is not good kay wa man nikita. Ang overhead cost mas taas pa sa income nga makuha,” Gipasabot ni Almendras.
Hinuon ang dakbayan sa Mandaue ang adunay dako nga pribadong’ ihawan.
Ug bisan sa pagsirado na sa ihawan, dugang ni Almendras, nga tutukan gihapon sa City Veterinary ang meat inspection diha sa kamerkaduhan.