WALA na gipaabot sa usa ka binilanggo nga mag-antos siya sa silot sa iyang sala nga nahimo, nakahukom nalang siya nga magpakamatay sulod sa iyang detention cell niadtong Biyernes.

Ang biktima nasiplatan nga nagbitay sa alas 3:45 sa hapon sulod sa comfort room sa mga pulis nga sakop sa Tugbok Police Station.

Ang biktima gitago sa pangalan nga Rey (tungod sa hangyo sa asawa), 40, mag-uuma ug nagpuyo sa Los Amigos, distrito sa Tugbok, siyudad sa Davao.

Base sa spot report sa kapulisan, ang biktima nagpakamatay pinaagi sa paghigot og habol sa iyang liog ug ang isig ka tumoy niini gihigot sa rehas (iron bar) sa maong comfort room.

Ang biktima daling gitabang nila Police Officer 3 Richard Navarro ug Police Officer 2 Remegio Briones.

Si Rey gisulayan pagdala didto sa Holy Trinity Hospital sa Mintal apan patay na siya sa dihang miabot sa tambalanan.

Ang biktima atua karon gihaya sa Angel Funeral Homes Calinan diin nahinabi sa Superbalita ang iyang asawa kagahapon pinaagi telepono.

"Among gipaimbestigahan sa Scene of the Crime Operatives (Soco) ang kamatayon sa akong bana kay buot namong klarohon kung wala bay foul play sa iyang kamatayon," ni Anne, asawa sa biktima kinsa midugang nga dunay mga bun-og ang kalawasan sa namatay.

Si Anne nagsulti nga natahap sila nga basin dunay nagpaluyo nga tanghaga sa kamatayon sa iyang bana sanglit walay gipakita nga mga ebidensiya ang kapulisan nga magpamatuod nga naghikog ang iyang bana.

"Wala man gud silay gipakita nga bisan picture nalang nga among makita nga tinuod naghikog ang akong bana," dugang pahayag ni Anne.

Ang namatay gipaslak sa selda sa kapulisan sa alas 5:00 sa hapon niadtong Huwebes tungod sa alegasyong pagpangabuso sa usa ka special child, butang nga dili makatuo ang asawa nga gihimo kini sa namatay. (AD)