NIADTONG Huwebes, Enero 24, gisugdan og pa-operate ang bag-ong traffic lights sa may eskina Tabok sa dakbayan sa Mandaue.
Nunot niini, grabeng kahuot sa dagan sa trapiko sa maong dapit ang nasinati sa mga motorista diin moabot sa duha ka oras ang biyahe gikan sa Mandaue padulong sa Consolacion.
Matud sa usa ka enforcer sa Traffic Enforcement Agency of Mandaue (TEAM) nga gipatukod ang maong mga traffic lights aron mapahapsay ang dagan sa trapiko sa dapit ug luwas nga makalabang ang mga tawo.
Apan alas 7:30 kaganihang buntag, Enero 25, gipalong sa TEAM ang mga traffic lights aron obserbaran og balik ang dagan sa trapiko sa maong dapit.
Sigon sa TEAM nga ilang nabantayan nga mas mohuot ang dagan sa trapiko kon gamiton ang traffic lights.
Sa karon, mano mano lang usa ang pagmandar sa trapiko sa eskina Tabok.